Nýsköpunarráðherra Íslands, Þórdís Kolbrún R. Gylfadóttir bakkar hvergi með þá ákvörðun sína að afleggja Nýsköpunarmiðstöð Íslands. Á heimasíðu flokksins segir:
„Í nýjasta aðgerðapakka ríkisstjórnarinnar er lögð sérstök áhersla á eflingu nýsköpunar.“ Það var og. Hverju ber að trúa? Síðan fylgir dæmigerður niðursoðinn texti:
„Auknum framlögum er veitt til fjárfestingar í sprotafyrirtækjum og endurgreiðsluhlutfall og fjárhæðarþak hækkað til fyrirtækja vegna rannsókna og þróunar. Áhersla er lögð á nýjar lausnir, ný verðmæti og ný störf.“
Endurgreiðslum vegna rannsókna og þróunar fyrir árið 2019 verður flýtt og endurgreiðsluhlutfall ársins 2020 hækkað úr 20% í 25%. Þá mun þakið hækka úr 600 milljónum í 900 milljónir króna. Þessum aðgerðum er ætlað að fjölga störfum í landinu með fjölgun og eflingu sprotafyrirtækja.
Áhersla er lögð á að flýta stofnun sprota- og nýsköpunarsjóðsins Kríu. Framlög til sjóðsins verða aukin og fjárfestingaheimildir lífeyrissjóða í vísisjóðum jafnframt rýmkaðar úr 20% í 35%. Þetta leiðir til enn aukinnar fjármögnunar þessara fyrirtækja og styrkir vaxtarmöguleika þeirra til muna.
Þessar aðgerðir koma til viðbótar við þær aðgerðir sem áður hafði verið ráðist í með fyrsta aðgerðapakkanum í mars, en þar voru m.a. framlög í Tækniþróunarsjóð aukin um 700 milljónir króna og í Rannsóknasjóð og Innviðasjóð Rannís um aðrar 700 milljónir króna.“
