Willum Þór Þórsson Framsóknarflokki var gestur í Silfrinu. Hann hafði það hlutverk að verja ríkisábyrgðina handa Icelandair. Willum hafði vondan málstað að verja. Willum Þór kann samt leikinn.
Hann valdi að tala sem minnst um það sem skipti máli. Hann byrjaði í löngu máli að tala um hversu mikil vinna væri að baki. Á skömmum tíma. Hann tiltók starf fólks í ráðuneytum, í þingnefndum, í þingsal, starfsfólk Alþings og eflaust fleira.
Svo mikið barmaði Willum sér að Þórhildur Sunna Ævarsdóttir Pírati sá aumur á Willum og sagði hann mann duglegan.
Willum Þór vildi sýnilega forðast að koma sér í vandræði. Kaus að halda umræðunni í myrkri og komst bara ágætlega upp með það. Þórhildur Sunna var málefnaleg og undirbúin. Það er bara ekki hægt að rökræða við mann sem forðast umræðuefnið. Og kemst upp með það.
Áhorfendur fengu ekkert. Ekkert nema góðan undirbúning og rökstuddan málflutning Þórhildar Sunnu.
-sme
