Vinnumarkaður Gengið hefur verið frá kjarasamningum við HS-Orku, OR, ON og Landsvirkjun á síðustu vikum. Kjarasamningarnir eru gerðir á hliðstæðum nótum og kjarasamningarnir sem gerðir voru á almennum vinnumarkaði sl. sumar. Í þessum kjarasamningum voru gerðar umfangsmiklar breytingar á gildandi launakerfum sem hafa verið við lýði.
Í samningunum náðist að samræma grunnlaun vélfræðinga hjá orkufyrirtækjunum eins og lagt var upp með fyrir þessar kjaraviðræður. Við þessa aðgerð hækka grunnlaun iðnaðarmanna töluvert án verulegs kostnaðarauka. Kostnaðaráhrif samningsins verða því örlítið meiri í upphafi vegna kerfisbreytinganna m.a. vegna hækkunar á yfirvinnu og álagsgreiðslum. Áfangahækkanir sem koma til á tímabilinu 2016-2018 eru þær sömu og í öðrum kjarasamningum sem gerðir hafa verið á almennum vinnumarkaði.
