„Ég ætla að mótmæla því, virðulegur forseti, að við meðhöndlum svo mikilvæg mál með þeim hætti að fara í einhvers konar samninga um að útdeila þingflokkum mjög takmörkuðum tíma til að ræða svo gríðarlega mikilvæg mál. Þannig ber til að Sjálfstæðisflokkurinn, sem er stærsti þingflokkurinn með 16 þingmenn, fær fimm mínútur, þingmenn utan flokka fá tvær mínútur og minnsti þingflokkurinn fær fjórar eða fimm mínútur,“ sagði Bryndís Haraldsdóttir Sjálfstæðisflokki.
„Ég viðurkenni að ég er furðu lostinn en jafnframt ánægður, að hér skuli ríða á vaðið í þessari umræðu háttvirtur þingmaður sem hefur lýst því yfir að hún kæri sig ekki um langar og leiðinlegar ræður og biður um aukinn ræðutíma um utanríkismál. Ég er náttúrlega algjörlega sammála því,“ sagði Þorsteinn Sæmundsson Miðflokki.
„Við Miðflokksmenn erum yfirleitt dálítið fyrir það að ræða mál í hörgul og ræða þau vel og fara vel yfir þau. Auðvitað tek ég undir þessa hvatningu um að við ræðum svo mikilvæg mál, sem utanríkismál eru, vel og gaumgæfilega. En ég er fyrst og fremst kominn hingað til að gleðjast yfir þessum sinnaskiptum háttvirtur þingmaður Bryndísar Haraldsdóttur sem hvetur til langra og leiðinlegra ræðuhalda um utanríkismál.“
