Eftir lestur vikulegrar greinar Styrmis Gunnarssonar er niðurstaðan sú að hér sé vilji til að viðhalda fátækt. Ekki til að útrýma fátækt á Íslandi eins og Styrmir segir.
Engum dylst að Bjarni Benediktsson hefur mestu völdin. Ekkert bendir til annars en að svo verði áfram. Hann er stuðningsmaður áframhaldandi fátæktar. Viljandi eða óviljandi. Fátæku fólki er sama hvort er. Hvoru tveggja er vont. Bjarni horfir til ríkasta fólksins og öflugustu fyrirtækjanna í núverandi ástandi. Og segir að fátækum komi afleiðingar kórónuveirunnar bara ekkert við. Hold kjæft og hana nú.
Styrmir er ekki sammála Bjarna. „Slíkar efnahagsaðstæður munu herða mjög að því fólki, sem veikast er fyrir að óbreyttu. Sá þjóðfélagshópur hefur að verulegu leyti horfið í skuggann af öðrum þjóðfélagsmálum og átökum. Þeir stjórnmálaflokkar, sem voru stofnaðir til að berjast fyrir hagsmunum þeirra, hafa horfið af vettvangi og arftakar þeirra gleymt þeim rótum sínum.“
Þarna hittir Styrmir svo sannarlega naglann á höfuðið. Fátækasta fólkið á enga talsmenn á Alþingi. Flokkar þess fóru annað.
Meðan núverandi staða er og verður í íslenskum stjórnmálum eiga fátækir enga málsvara. Nema kannski í allra minnsta þingflokknum, það er í Flokki fólksins. Aukið fylgi Sjálfstæðisflokksins tryggir að Bjarni ráði næstu árin. Kannski ekki með VG og Framsókn. Þá bara einhverjum öðrum. Allir virðast vilja í fang Bjarna. Fátæku fólki til ama.
Fátækt er vond og samfélaginu til skammar. Við sem höfum reynt fátækt vitum um hvað við erum að tala. Svo er ekki með alla.
Styrmir á sér draum, sem ekki rætist: „Og þar sem nánast er hægt að slá því föstu að erfiðir tímar séu fram undan er ástæða fyrir þá, sem á annað borð hafa áhuga á að eyða í eitt skipti fyrir öll fátækt á Íslandi (og í þeim hópi er sá fjöldi útigangsmanna, sem enn er til staðar í næsta nágrenni við okkur öll), að taka höndum saman, hvar í flokki sem þeir standa, til þess að undirbúa aðgerðir í þá veru.“
Ekki er einn einasti vilji til að þetta nái eyrum ráðafólks. Ekki einn möguleiki. Fátæka vantar ekki bara að rödd þeirra heyrist. Fátæka vantar mikið, mikið meira. Fátækir eiga enga möguleika á þessu kjörtímabili og ekki á því næsta. Fátækir eru utangarðs í stjórnmálunum.
-sme
