Vilja áfram „braska“ með makrílinn

Þau hafa notað aflaheimildirnar á annan hátt, selt þær eða skipt yfir í aðrar tegundir.

Fyrirtækin Þorbjörn hf., Nesfiskur hf. og Rammi hf. standa saman að mótmælum vegna frumvarps Kristjáns Þórs Júlíussonar, þar sem hann vill færa útgerðum stóru uppsjávarveiðiskipanna, þar á meðal Samherja, þar sem ráðherrann var stjórnarformaður, megin hluta makrílsins.

Útgerðirnar þrjár, sem hafa ekki veitt makríl síðustu þrjú ár, aðeins selt aflaheimildirnar, mótmæla frumvarpinu þar sem með því, eru að áliti útgerðarfélaganna, lagðar til breytingar sem fela í sér að umtalsverðar aflaheimildir flytjast frá vinnslu- og ísfisksskipum yfir á uppsjávarveiðiskip.

Fyrirtækin þrjú hafa fengið úthlutað heimildum frá árinu 2010 og þau segjast hafa að mestu nýtt þær til veiða, sem er ekki nákvæm lýsing, þar sem þau hafa ekki gert út á makríl í þrjú ár. Þau hafa notað aflaheimildirnar á annan hátt, selt þær eða skipt yfir í aðrar tegundir.

Þau segja þau viðskipti verið báðum aðilum til hagræðis. Þau segjast hafa unnið eftir þeim lögum sem gilt hafi um stjórn fiskveiða og þrátt fyrir að stjórnun á veiðum á makríl hafi verið með öðrum hætti en aflamarksstjórn þá hafi hún svipað til aflamarksskipulags og því hafi stjórnendur metið það svo að sömu leikreglur giltu um stjórn á makríl og á öðrum tegundum.

Efni frumvarpsins er því mótmælt og gerð tillaga um þá breytingu að notuð verði sex bestu árin af síðastliðnum 11 til viðmiðunar.

Ár	Heildarafli ísl. skipa (t)	A Uppsjávarskip (t)	B Frystiskip (t)	C Skip án vinnslu (t)	D Skip með línu og handf. (t)
2008	112.300	4.000	0	0	0
2009	116.200	4.600	0	0	0
2010	120.900	2.800	285	0	0
2011	153.400	3.600	1.400	60	0
2012	145.900	3.300	1.800	100	85
2013	137.600	3.200	2.900	140	85
2014	154.700	3.700	2.400	130	120
2015	163.400	3.400	2.300	45	90
2016	158.900	6.300	0	0	215
2017	159.100	8.300	0	0	120
2018	129.600	5.300	0	0	76
Afli bestu tíu ára		45.700	11.085	475	791
Afla­hlut­deild:		3,051%	0,740%	0,032%	0,053%

    * Afli hefur verið námundaður til einföldunar.