Nú skal allt gert til að taka Sólveigu Önnu og hennar fólk niður enda lá það strax fyrir að meðal annars fyrrverandi valdhafar í Eflingu stéttarfélagi gátu alls ekki sætt sig við það að hún og hennar fólk hafi unnið stórsigur stjórnarkosningum í Eflingu.
Þetta var í rauninni skrifað í skýin og ekkert af þessu kemur mér á óvart enda blasir við að kosning Sólveigar Önnu hefur gjörbreytt öllum valdahlutföllum í íslenskri verkalýðshreyfingu og það eru mjög margir sem vilja leggja stein í götu hennar því þeim hugnast ekki að þeir séu að missa völdin í íslenskri verkalýðshreyfingu.
Ég vil taka það fram að ég þekki ekki til þess ágreinings sem nú ríkir á skrifstofu Eflingar en það er hins vegar rétt að vekja athygli á því að það er mjög algengt að hluti starfsfólks sætti sig alls ekki við að nýir aðilar taki við stjórnartaumunum eftir kosningar eins og gerðist í Eflingu.
Ég vil taka fram að ég hef unnið náið með Sólveigu Önnu og Viðari, framkvæmdastjóra Eflingar, frá því þau tóku við stjórnartaumunum og ég dáist að þeim krafti og dugnaði sem þau hafa sýnt frá því þau tóku við. Mín kynni af þessu fólki eru að hér er um heiðarlegt og traust fólk að ræða sem vill breyta íslenskri verkalýðsbaráttu þar sem hagsmunir þeirra sem höllustum fæti standa verði hafðir að leiðarljósi.
Stjórn Sólveigar Önnu hefur gert marga frábæra hluti á þeim stutta tíma frá því hún tók við, m.a. með þessu verkefni sem ber heitið „Fólkið í Eflingu“ og það liggur fyrir stjórnarsamþykkt fyrir þessu verkefni eins og fram kemur í fjölmiðlum. Þetta brýna verkefni segir sögu lágtekjufólks á íslenskum vinnumarkaði en rétt er að geta þess að það er brýnt að saga lágtekjufólks komist upp á yfirborðið og er þetta framtak stjórnar Sólveigar Önnu því til fyrirmyndar.
Öll svona sérverkefni kosta fjármuni alveg eins og það kostar mikla fjármuni að verja réttindi og gróf kjarasamningsbrot launafólks fyrir dómstólum og með lögfræðilegum innheimtuaðgerðum.
Sólveig Anna og hennar fólk hefur líka komið með nýjungar í starfsemi Eflingar m.a. með því að halda opna fundi um hin ýmsu mál er tengjast verkalýðsmálum og það á hverjum laugardegi í Gerðubergi en hennar stjórn leggur mikla áherslu á að lýðræðisvæða félagið eins og kostur er.
Munum að það eru mjög margir sem eru ósáttir við að Sólveig Anna og hennar fólk hafi unnið þennan stórsigur í stjórnarkosningum í Eflingu, ekki bara gamla ASÍ forystan heldur líka fólk í röðum efnahagslegu forréttindahópanna enda er eitt helsta baráttumál hennar að ráðast að rótum misskiptingar, óréttlætis og ójöfnuðar. Stjórn Sólveigar Önnu hefur kallað eftir róttækum breytingum íslensku lágtekjufólki til hagsbóta sem og róttækum kerfisbreytingum þar sem tekið verði á ofurvaldi fjármálakerfisins.
Ég skal fúslega viðurkenna að með tilkomu Ragnars Þórs og Sólveigar Önnu í íslenska verkalýðsbaráttu hef ég fengið von, von um að hægt sé að kalla eftir róttækum kerfisbreytingum íslensku lágtekjufólki og íslenskum heimilum til hagsbóta. En munum að það eru sterk öfl sem hræðast þessar breytingar því sérhagsmunaelítan kann svo sannarlega að verja sitt hreiður og þar er öllum vopnum beitt!
Eins og áður sagði eru margir sem óttast þá breytingu sem er að eiga sér stað í íslenskri verkalýðsbaráttu og því þarf það alls ekki að koma á óvart að reynt sé að kasta rýrð á traust og trúverðugleika stjórnar Sólveigar Önnu en ég er ekki í neinum vafa um að Sólveig Anna og hennar fólk geti svo sannarlega útskýrt sína hlið á þessu máli þótt ætíð sé erfitt að ræða persónuleg starfsmannamál.
