„…sem er lygi, svívirðileg lygi.“
Sólveig Anna Jónsdóttir, formaður Eflingar, skrifar:
Það er ekki gaman að þurfa að standa í þessu ógeðslega rugli. En það er ekkert annað í boði en að svara þegar að endalaust er farið fram með ósannindum og lygum. Nú er því aftur haldið fram að ég hafi reynt að koma í gegn óeðlilegum greiðslum úr sjóðum félagsins, sem er lygi, svívirðileg lygi. Mikið hlýtur fólk sem fer fram með þessum hætti að hafa lélegan málstað að verja. Mig langar mjög að tjá mig um Láru V. Júlíusdóttur og hennar málflutning en hem mig í bili. Ætla samt að leyfa mér að segja að síðast þegar hún tróð sér inn í líf mitt reyndi hún að fá mig dæmda í allt að lífstíðarfangelsi. Þá hafði hún líka mjög lélegan, ef svo má að orði komast, málstað að verja.
Hér er enn önnur yfirlýsing frá Eflingu. Ég bið ykkur um að lesa hana, það skiptir máli að sannleikurinn fái að heyrast.
„Fjölmiðlar birtu í gærkvöldi, 22. september 2019, yfirlýsingu frá Kristjönu Valgeirsdóttur þar sem bornar eru upp ósannar fullyrðingar um starfsemi og starfsfólk Eflingar.
Áréttað er að Efling hefur í einu og öllu virt réttindi starfsmanna sinna samkvæmt ráðningarsamningum, kjarasamningum og lögum. Efling hefur hins vegar ekki viljað fallast á kröfur um greiðslur úr sjóðum félagsins, á kostnað félagsmanna, sem eru langt umfram það sem telst heimilt eða eðlilegt.
Að ósk Kristjönu fjallaði stjórn Eflingar um kröfu lögmanns hennar um starfslokagreiðslur sem fólu í sér að Kristjana fengi full laun fram að eftirlaunaaldri eða í þrjú og hálft ár. Kostnaður við slíkar starfslokagreiðslur hefði varlega áætlað hlaupið á 40-50 milljónum króna. Stjórn Eflingar taldi þessar kröfur úr öllu hófi og var þeim því hafnað. Stjórn félagsins áréttaði um leið að Efling mun að sjálfsögðu virða réttindi Kristjönu samkvæmt ráðningarsamningi, kjarasamningi og lögum. Efling hefur nálgast málið í samræmi við þá afstöðu stjórnar og virt í einu og öllu réttindi hennar.
Vegna ummæla Kristjönu, sem skilja má sem svo að hún hafi haft uppi athugasemdir við stjórnendur félagsins um ósamþykkt fjárútlát, vill Efling taka fram að enginn stjórnandi eða starfsmaður á skrifstofu Eflingar hefur svo vitað sé móttekið slíkar athugasemdir. Fjárútlát félagsins og rekstur er í fullu samræmi við reglur félagsins og eru einstakir kostnaðarliðir lagðir fyrir stjórn til samþykktar eftir því sem við á. Enginn fótur er fyrir ásökun Kristjönu um ósamþykktar greiðslur úr sjóðum félagsins og eru þær með öllu úr lausu lofti gripnar. Efling harmar að gripið sé með þessum hætti til ósanninda í því skyni að reyna að þvinga fram óeðlilegar starfslokagreiðslur eins og lýst er hér að ofan.“