Til að gera upp áhrif og afleiðingar af ólöglegri starfsemi Sjálfstæðisflokksins ætti að setja upp sérstakan dómstól.
Gunnar Smári skrifar:
Til að gera upp áhrif og afleiðingar af ólöglegri starfsemi Sjálfstæðisflokksins ætti að setja upp sérstakan dómstól, eins og margar þjóðir hafa gert þegar þær losna undan kúgunaröflum, eða sannleikanefnd, ef fólk vill fremur sannleikann en að draga hin seku til ábyrgðar. Í Bandaríkjunum er nú rætt um skaðabætur vegna þrælahaldsins, bætur sem veittar yrðu afkomendum þræla fyrir þá efnahagslegu kúgun og þjófnað sem þrælahaldið fól í sér og sem dregið hefur afleiðingar sínar eftir þeim ættum sem liggja frá þrælunum. Það mætti kanna hvort slíkt væri gerlegt á Íslandi; finna það fólk sem Sjálfstæðisflokkurinn hélt frá störfum við hæfi eða neitaði um lán, lóðir eða aðra sjálfsagða fyrirgreiðslu og láta flokkinn borga þessu fólki eða afkomendum þess skaðabætur.
Sjálfstæðisflokkurinn skráði ekki stjórnmálaskoðanir fólks aðeins til að hámarka árangur í kosningum heldur til að tryggja að sósíalistar og fólk sem barðist fyrir réttlæti og jöfnuði fengi ekki stöður, lán og önnur gæði sem flokkurinn deildi út eftir að hann hafði náð völdum og orðið samgróinn öllum meginkerfum samfélagsins. Eins og hann er enn í dag, þar sem aðrir stjórnmálaflokkar beygja sig undir vald xD þótt kjósendur hafi yfirgefið flokkinn. Sjálfstæðisflokkurinn er því Stasi Íslands, stundaði viðurstyggilegar persónunjósnir, hann er Sovét Íslands, sem gætti þess að enginn nema innvígðir og innmúraðir flokksmenn fengju framgang hjá hinu opinbera eða í einkafyrirtækjum, og hann er mafía Íslands, sem verndaði innvígða en veigraði sér ekki við að rústa lífi þeirra sem hann skilgreindi sem andstæðinga.