„Mantra nokkurra sjálfstæðismanna er að gera lítið úr konum sem fylgja sannfæringu sinni og eru bara rétt um þrítugt og þaðan af yngri. Sumir halda að konur í stjórnmálum séu bara gluggaskraut.“
„Sýndarmennska og lýðskrum gera lítið úr vitrænu pólitísku starfi. Flokkar og stjórnmálamenn færast til á litrófi stjórnmálanna hraðar en auga er deplað,“ skrifar stofnandi Viðreisnar, Benedikt Jóhannesson.
Hann var áður dyggur flokksfélagi í Sjálfstæðisflokki.
„Áratugum saman barðist Sjálfstæðisflokkurinn fyrir einstaklingsfrelsi, frjálsum viðskiptum, afnámi forréttinda, markaðslausnum og vestrænni samvinnu. Aðrir flokkar aðhylltust aðra stefnu, t.d. ríkisforsjá og forréttindi kaupfélaganna.
„Að undanförnu hefur borið á því að Sjálfstæðisflokkurinn, eða sterk öfl innan hans, telji að flokkurinn eigi að fylgja þeim sem vilja snúa aftur til þeirra tíma þegar þjóðir einangruðu sig.“
Þarna er fast skotið. Skotmarkið er ekki síst ritstjóri Moggans og fylgihnettir hans.
Benedikt heldur áfram: „Að undanförnu hefur borið á því að Sjálfstæðisflokkurinn, eða sterk öfl innan hans, telji að flokkurinn eigi að fylgja þeim sem vilja snúa aftur til þeirra tíma þegar þjóðir einangruðu sig og telja að sundrung vinaþjóða feli í sér sérstök tækifæri fyrir Ísland. Stór hópur innan flokksins er andstæður markaðslausnum þar sem þær rekast á við sérhagsmuni.“
Benedikt segist, sem formaður Viðreisnar, hafa tekið meira tillit til samþykkta landsfundar Sjálfstæðisflokkins, en frændi hans, Bjarni Benediktsson formaður þess flokks.
„Þegar Viðreisn myndaði ríkisstjórn síðla hausts 2016 kynntum við okkur nýjustu ályktanir landsfundar Sjálfstæðisflokksins vel. Lítill munur var á áherslum Viðreisnar og Bjartrar framtíðar og því mikilvægt að finna samnefnara með Sjálfstæðisflokknum. Þegar samþykktir þessarar æðstu stofnunar sjálfstæðismanna fóru saman við hugmyndir okkar töldum við að auðvelt yrði að ná samkomulagi.
Öðru nær. Ályktanir landsfundar fengu margar lítinn hljómgrunn – ekki hjá okkur heldur flokknum sem hafði samþykkt þær. Því kemur ekki á óvart að læknar í einkarekstri tala um „ríkisvæðingarstefnu dauðans“ meðan sjálfstæðismenn í ríkisstjórn fylgjast þöglir með.“
Næst slær Benedikt til að ritstjórans í Hádegismóum.
„Mantra nokkurra sjálfstæðismanna er að gera lítið úr konum sem fylgja sannfæringu sinni og eru bara rétt um þrítugt og þaðan af yngri. Sumir halda að konur í stjórnmálum séu bara gluggaskraut.
Elliði Vignisson bæjarstjóri sagði nýlega um annan vanda Sjálfstæðisflokksins: „Í dag eru frjálslyndir búnir að finna sér tærari rödd innan annars vegar Viðreisnar og hins vegar Pírata. Þar er talað skýrar um frelsi, laissez-faire og önnur slík prinsippmál.“ Vandi Pírata er reyndar að erfitt er að átta sig á því hver stefna þeirra er í flestum málum.“
Benedikt endar skrif sín með því að bjóða alla velkomna til Viðreisnar.
„Á sama tíma hefur Samfylkingin kvatt miðjuna og færst til vinstri til þess að reyna að ná þeim atkvæðum af VG sem ekki vilja sjá samstarf við Sjálfstæðisflokkinn.
Því er kominn tími fyrir marga til þess að hugsa málin upp á nýtt. Viðreisn var stofnuð til þess að frjálslyndir kjósendur ættu sinn málsvara, til þess að rödd neytenda heyrðist og ferskir vindar blésu um vettvang stjórnmálanna. Viðreisn er opin öllum sem unna frelsinu.“