Ungt jafnaðarfólk fordæmir ómannúðlegt útlendingafrumvarp ríkisstjórnar Katrínar Jakobsdóttur harðlega.
Ungt jafnaðarfólk var slegið eftir áhorf á Silfrinu um helgina þar sem Jódís Skúladóttir, þingkona VG og talskona meirihlutans í útlendingamálinu staðfesti loks það sem okkur grunaði, að VG er ekki vinstri flokkur.
Ungt jafnaðarfólk fordæmir frumvarpið harðlega. Með því er fólki í neyð hent á götuna og það svipt grunnþjónustu. Ekki fæst séð hvernig það samræmist mannréttindaákvæðum stjórnarskrár og alþjóðlegum skuldbindingum um mannréttindi. Þá er gengið verulega á réttindi barna sem er í hrópandi ósamræmi við barnalög og barnasáttmála Sameinuðu þjóðanna.
Ungt jafnaðarfólk veltir fyrir sér hvar Framsókn stendur í þessu máli. Hvar er barnamálaráðherrann sem sagðist ætla huga sérstaklega að börnum sem búa við erfiðar aðstæður? Er Ásmundur Einar kannski bara ráðherra sumra barna?
Ungt jafnaðarfólk var slegið eftir áhorf á Silfrinu um helgina þar sem Jódís Skúladóttir, þingkona VG og talskona meirihlutans í útlendingamálinu staðfesti loks það sem okkur grunaði, að VG er ekki vinstri flokkur heldur einangrunarsinnaður íhaldsflokkur. Í stað þess að leggja áherslu á að fjárfesta í mikilvægum innviðum samfélagsins og styðja betur við grunnþjónustu gaf hún í skyn að fjöldi útlendinga væri vandamálið. Það hefur sömuleiðis verið sorglegt að fylgjast með framgöngu Katrínar Jakobsdóttur forsætisráðherra og formanns VG í þessu máli – hún stendur þétt við bakið á Jóni Gunnarssyni og styður ómannúðlegt útlendingafrumvarp Sjálfstæðisflokksins.
Ungt jafnaðarfólk skorar á þingmenn og þá sér í lagi stjórnarflokkanna að kjósa gegn útlendingafrumvarpinu. Við megum ekki skila auðu þegar það kemur að mannréttindum.