Jón Þór Ólafsson Pírati flutti hreint ágæta tölu um stöðu Vinstri grænna. Hann var að ræða um eftirgjöf VG í málefnum fiskeldis og minntist aðeins á umhverfisstefnu þess flokks:
Í umhverfisstefnu Vinstri grænna segir, með leyfi forseta:
„Vistkerfi jarðar stendur ógn af markaðshagkerfinu. Gróðasjónarmið hafa ráðið för í umgengni við náttúruna.“
Svo stendur aðeins neðar, með leyfi forseta:
„Náttúran njóti vafans.“
„Þetta skiptir máli fyrir Vinstri græna, alla vega borgaraarm eða mennta- og menningarmálaarm Vinstri grænna, sem er hérna í borginni og svo ertu með framsóknararminn úti á landi. Ef við horfum á skoðanakannanir þá er borgaraarmurinn bara að þurrkast út. Út af atvinnustefnu Vinstri grænna úti á landi er umhverfismálunum alltaf fórnað og borgaraarmurinn fær að borga fyrir það. Það er verið að fjölga þingmönnum í Norðvesturkjördæmi en þeim er að fækka um einn, tvo hérna á höfuðborgarsvæðinu einmitt út af þessu. Þetta er framsóknarríkisstjórn þannig að það er skiljanlegt að því leytinu til. En þetta er eitthvað sem umhverfismálaráðherra Vinstri grænna ætti að hugsa mjög vel um.“
Stofnandi VG, Steingrímur J. Sigfússon þingforseti var ekki hrifinn af skýringum Jóns Þórs og sagði:
„Forseti minnir á að eldhúsdagurinn er ekki fyrr en á miðvikudaginn.“
