Neytendur Kristófer Már Kristinsson skrifar grein á Facebokk þar sem rekur samskipti sín við Skeljung. Kristófer er fínn penni. Hér er greinin hans:
„Ég gerði upp dánarbú gasgrillsins í dag. Kom því í líkbíl á haugana og fór með gaskútana 2 þangað sem ég keypti þá, Skeljung efst á Laugaveginum. Þar hef ég fengið skiptikúta og borgað fyrir gasið í gegnum árin. Nú vildi svo til að í haust hafði ég fengið nýjan kút (ca 5000 kr gasið) en grillið gafst upp áður en ég tengdi hann. Ég fór þess vegna með einn nánast tóman og annan fullan á fund þessa viðskiptafélaga míns í gegnum árin, Skeljungs. Þar var mér tekið einkar vel þar til kom að uppgjöri. Í fyrsta lagi voru þeir ekki til í að skila mér peningunum sem ég lét þá fá fyrir einhverjum árum en buðu mér inneignarnótu. Svo kom í ljós að gasið í fulla kútnum var einskis virði þegar það var í minni eigu, reglan er sú að við borgum ekki fyrir það sagði stöðvarstjórinn, þú verður bara að fara upp á Höfða og tala við þá, hverjir sem þeir eru. Næst þegar ég kaupi bensín ætla ég að bjóða inneignarnótu sem greiðslu. Ég sagði stöðvarstjóranum að réttlætiskennd minni væri gróflega misboðið. Keypti bensín og rúðupiss fyrir inneignina og ætla aldrei aftur að versla við fyrirtækið.“
