Alþingi „Þetta eru óboðleg vinnubrögð og eins og hér hefur komið fram er eitthvert slugs í fjárlaganefnd sem gerir það að verkum að við erum komin í þetta tímahrak hérna. Þess vegna er ekki boðlegt að það eigi að vinna þetta upp með því að sitja hér langt fram á nætur og flytja þá fyrstu ræður manna við aðra umræðu fjárlaga,“ sagði Kristján Möller á Alþingi í gær, þegar talað var um hvort þingið myndi funda fram á nótt.
„Það sem ég vil gera að umtalsefni, af því að menn eru að ræða um það núna að það þurfi að ræða fjárlög langt fram á nótt, er að í þingskapanefnd sem ég hef átt sæti í á undanförnum þingum var samkomudegi Alþingis breytt þannig að hann yrði annar þriðjudagur í september í stað 1. október. Hvers vegna var þetta gert, virðulegi forseti? Jú, einmitt til að gefa fjárlaganefnd lengri tíma til að vinna fjárlagafrumvarpið og koma með þau mál tímanlega til þings.“
„Nú hefur komið fram að núverandi fjárlaganefnd undir forustu Vigdísar Hauksdóttur og Guðlaugs Þór Þórðarsonar varaformanns er tíu dögum á eftir áætlun með aðra umræðu fjárlaga. Við sem sitjum í forsætisnefnd lásum um það í blöðunum einn morguninn að Vigdís Hauksdóttir hefði tilkynnt að önnur umræðu fjárlaga færi ekki fram á réttum tíma.“