Neytendastofa hvetur fólk til að athuga hvort föt barna upp að sjö ára aldri séu með bönd í hettum eða hálsmáli en slíkt er bannað þar sem það getur verið börnunum hættulegt. Fyrir börn á aldrinum 7-14 ára mega böndin ekki vera lengri en 7,5cm.
Á heimasíðu Neytendastofu má sjá að Neytendastofa tók þátt í evrópsku samstarfsverkefni á síðasta ári þar sem skoðað var hvort að bönd og reimar í barnafatnaði væru of löng. Á hverju ári verða börn fyrir slysum um allan heim vegna þess að bönd eða reimar í fatnaði hafa verið of löng. Vegna þessa hafa þau flækst t.d. í reiðhjólum, hurðum og í leikvallartækjum og geta atvik sem þessi leitt til alvarlegra áverka og jafnvel dauða. Vegna þessa var ákveðið að fara í átak fyrir 4-5 árum og síðan aftur á síðasta ári, til þess að athuga hvort að sá fatnaður sem boðinn er neytendum í Evrópu sé öruggur og uppfylli þau skilyrði sem gerð eru til hans. Skoðaðar voru um 6000 flíkur og voru tæplega 700 þeirra skoðaðar nánar og mældar.
Hér á landi var lögð áhersla á að skoða íslenska framleiðslu. Skoðaðar voru um 500 flíkur og voru 58 teknar til nánari skoðunar og mældar. Af þeim reyndust 48% vera með of löng bönd eða reimar. Í kjölfarið voru innkallað vörur frá tíu fyrirtækjum. Neytendastofa þurfti í einu tilviki að taka stjórnvaldsákvörðun þar sem fyrirtæki var gert að innkalla fjórar gerðir af barnafatnaði.
Algengasti annmarkinn var sá að í fötum fyrir börn á aldrinum 0-7 ára (hæð 1,34 m) voru bönd í hettum eða hálsmáli en bannað er að hafa bönd í þeim flíkum. Fyrir börn á aldrinum 7-14 ára mega böndin ekki vera lengri en 7,5 cm í hettu eða hálsmáli.
Neytendastofa hvetur fólk til að athuga föt barna sinna og fjarlægja eða stytta bönd og reimar sem ekki uppfylla kröfur varðandi barnaföt, líkt og kemur fram í myndbandinu.
Sjá frétt á vef Neytendastofu.
