Vangadans Bjarna og Viðreisnar
Fullkominn einhugur virðist milli Viðreisnar og Bjarna Benediktssonar, og þá Sjálfstæðisflokksins, um sölu viðskiptabanka.
„Ég get glatt hæstvirtan fjármálaráðherra með því að minn ágæti flokkur á landsþingi sínu um þarsíðustu helgi samþykkti stefnu sem er afar skýr í þessum efnum, þar sem þessu er lýst einfaldlega með orðunum: Selja skal bankana. Þannig að já, mér líst ágætlega á þá hugmynd að losa um eignarhlutdeild ríkisins í bönkunum og nota þá til að greiða upp skuldir,“ sagði Pawel Bartoszek, varaþingmaður Viðreisnar, eftir að Bjarni Benediktsson, fjármálaráðherra og formaður Sjálfstæðisflokksins, innti hann eftir, á Alþingi, hvort; „…hann er sammála mér í því efni að stóra tækifærið til uppgreiðslu skulda liggi í því að draga úr umsvifum ríkisins á fjármálamarkaði.“
„Það er gott að það er stuðningur við það í þinginu að losa um eignarhald ríkisins á fjármálafyrirtækjum og reyndar er um það skrifað í samstarfssamningi eða stjórnarsáttmálanum,“ sagði Bjarni að fengnu svari frá Pawel.
Pawel sagði gott að fjallað sé um losun eignarhlutdeildar í bönkunum í stjórnarsáttmálanum. „Eignarhald ríkisins á fjármálafyrirtækjum er það umfangsmesta í Evrópu og vill ríkisstjórnin leita leiða til að draga úr því,“ segir í stjórnarsáttmála núverandi ríkisstjórnar.
Af orðaskiptum þeirra Bjarna og Pawels er ljóst að full eining er milli flokka þeirra um hvað beri að gera varðandi eignarhald ríkisins í bönkunum.
