Björn Birgisson í Grindavík útilokar að kjósa Viðreisn. Vegna þess að Viðreisn útilokar engan flokk. Ekki einu sinni Sjálfstæðisflokk og Miðflokk. Björn setti sig í samband við Þorgerði Katrínu Gunnarsdóttur, formann Viðreisnar, og skrifaði svo á Facebook og birti meðfylgjandi mynd:
„Örlítill páskaboðskapur.
Þar sem ég fyrir mitt leyti vil algjörlega útiloka að svokölluð Trumpista áhrif og einangrunarhugsun nái fótfestu í okkar landsstjórn liggur algjörlega ljóst fyrir af minni hálfu að Sjálfstæðisflokkurinn og Miðflokkurinn mega ekki undir neinum kringumstæðum taka þátt í næstu ríkisstjórn.
Klippt og skorið.
Skýr afstaða – óhagganleg.
**********
Var hrifinn af síðasta útspili Viðreisnar varðandi frekari viðræður við Evrópusambandið, en ljóst er að það útspil nær aldrei neinu flugi fari Viðreisn í samstarf við Sjálfstæðisflokkinn að loknum kosningum í haust.
Lagði því þessa spurningu fyrir Þorgerði Katrínu Gunnarsdóttur, formann Viðreisnar:
Er sá möguleiki í stöðunni að Viðreisn fari í ríkisstjórn með Sjálfstæðisflokknum eftir kosningar í haust – eða er sá möguleiki útilokaður?
Ekki stóð á svarinu!
„Við höfum ávallt sagt að við ætlum ekki að útiloka neinn flokk. Málefnin ráða því alfarið hvort við tökum þátt í myndun ríkisstjórnar eða ekki.“
Sem sagt – engin útilokun fyrirfram.
Það svar dugar mér hins vegar til útilokunar.
Viðreisn getur ekki fengið mitt atkvæði í haust.
Get ekki með nokkru móti stutt neinn flokk sem ekki útilokar samstarf við Sjálfstæðisflokkinn og Miðflokkinn fyrirfram.“
