Útgerðin ráði veiðigjaldinu
„Það er mikilvægt í ljósi þess að oft er hér um sameiginlega stofna að ræða og að íslensku fyrirtækin hafa aldrei verið spurð hvað þau vilja borga!“
Gunnar Tryggvason skrifar um veiðigöldin hér á landi og svo það verð sem færeyskar útgerðir borga í veiðigjöld þar í landi, þar sem helstu kvótar eru boðnir upp.
Gunnar skrifar:
„Útboð veiðiheimilda í Færeyjum:
Sem áhugamaður um skilvirkar markaðslausnir hef ég fylgst með útboði veiðiheimilda í Færeyjum í sumar. Boðnar hafa verið út fjórar tegundir (Botnfiskur = Þorskur, ýsa og ufsi hér talin ein tegund) í alls sjö útboðum. Verðin má sjá í töflunni hér fyrir neðan, borin saman við veiðigjöld þau sem atvinnuveganefnd alþingis lagði til í vor. Það frumvarp varð ekki að lögum eins og kunnugt er, en ráðherra hefur boðað nýtt frumvarp á því þingi sem brátt mun hefjast.
Ég hef aldrei skilið hvers vegna við fetum ekki þessa braut að láta fyrirtækin sjálf um að ákvarða veiðigjöldin. Þess í stað efnum við til sífella deilna um ákvarðanir stjórnmálamanna. Eflaust eru til skýringar á þeim mikla mun sem þarna birtist, eða hluta hans, en mikilvægt er að þegar nýtt frumvarp lítur dagsins ljós verði gerð tilraun til að skýra hann út fyrir okkur. Það er mikilvægt í ljósi þess að oft er hér um sameiginlega stofna að ræða og að íslensku fyrirtækin hafa aldrei verið spurð hvað þau vilja borga!“
