„Uppreisn grasrótarinnar í Sjálfstæðisflokki og Framsókn vegna Orkupakka 3 á sér áþekkar skýringar.“
Auðvitað er framsóknarmönnum ljósara en öðrum hvaða afleiðingar það gæti haft fyrir fylgi flokksins.
„Úr Framsóknarflokknum berast nú þær fréttir, að grasrótin þar sé að rísa upp gegn Orkupakka 3 ekki síður en í Sjálfstæðisflokknum. Einn virkur flokksmaður hefur lýst andrúmsloftinu innan flokksins á þann veg, að þar sé allt logandi vegna málsins.“
Þetta má lesa á styrmir.is, vefsíðu Styrmis Gunnarssonar. „Þetta kemur ekki á óvart. Auðvitað er framsóknarmönnum ljósara en öðrum hvaða afleiðingar það gæti haft fyrir fylgi flokksins, standi þingmenn hans að samþykkt orkupakkans á Alþingi á sama tíma og þingmenn Miðflokksins greiði atkvæði gegn,“ skrifar Styrmir.
Styrmir, sem berst hart gegn samþykkt þriðja orkupakkans, bendir á þetta:
„Það er jafnframt gagnlegt fyrir forystusveitir beggja þessara flokka að fylgjast vel með úrslitum sveitarstjórnarkosninga, sem fram fóru á Englandi og Norður-Írlandi í gær, fimmtudag. Í morgun var orðið ljóst að Íhaldsflokkurinn hafði tapað um 400 fulltrúum í sveitarstjórnum og spár bentu til að þeir gætu tapað um 800 fulltrúum, sem teldist afhroð. Ástæðan er meðferð flokksforystunnar á útgöngunni úr ESB.“
„Verkamannaflokkurinn er líka að tapa fylgi en Frjálslyndir að vinna á. Kosningar til Evrópuþingsins verða innan skamms og Bretar taka þátt í þeim vegna frestunar á útgöngu. Kannanir benda til enn verri útreiðar Íhaldsflokksins þar,“ skrifar Styrmir og bendir svo á:
„Uppreisn grasrótarinnar í Sjálfstæðisflokki og Framsókn vegna Orkupakka 3 á sér áþekkar skýringar.“
