IJ: Gleymdist kannski að segja ykkur frá því?
Sigurjón Magnús Egilsson skrifar:
Ég var að fara að skrifa um nýju hersetuna þegar ég sá þessi skrif Illuga Jökulssonar um sama mál. Þar sem Illugi er mér fremri í skrifum sem þessum kýs ég að nota frekar skrif Illuga en skrifa sjálfur.
Áður en ég vitna til Illuga verð ég að segja sem er. Ég er undrandi bit á að skipulagsvald hafi verið flutt til Nató og Trumps. Ég þykist fylgjast vel með en umræður í stjórnmálum vegna hinnar nýju hersetu kannast ég bara ekkert við.
Illgui skrifar:
„Halló, VG. Hafiði tekið eftir því að ameríski herinn er að koma aftur? Herinn hans Trumps, sko, hann er að koma aftur til Íslands, vissuði það? Þið eruð að vísu á móti ameríska hernum á Íslandi, er það ekki, en samt er hann að koma aftur. Gleymdist kannski að segja ykkur frá því? Ja, þið eruð náttúrlega voða mikið svona á ráðstefnum í útlöndum, svona að hafa það huggulegt, að segja eitthvað huggulegt, að vera hugguleg, þið eruð voða hugguleg, já, sannarlega eruði hugguleg, svo það er varla von þið megið vera að því að fylgjast með hvort hingað komi her, bara smá her, herinn hans Trumps, þið getið ekki verið að fylgjast með því, þið eruð að hafa það huggulegt, einn her, ein virkjun, ein stjórnarskrá, hvað er fólk að raska ró ykkar með þessu, þið eruð að tátla hrosshárið ykkar, svona hugguleg, að rækta sjálf ykkur, einn her, hvað kemur það ykkur við?“
