DO: Trump gerir rétt, Bjarni Ben ekki

Davíð Oddsson er hrifnari af skattastefnu Bandaríkjaforseta en íslensku ríkisstjórnarinnar. Davíð segir Trump hafa lagt fram metnaðarfullar tillögur um skatta. Leiðari Morgunblaðsins í dag hefst svona: „Donald Trump Bandaríkjaforseti lagði fram í síðustu viku metnaðarfullar tillögur að skattalækkunum á bandarískan almenning og fyrirtæki, þar sem um leið var lögð áhersla á að einfalda skattkerfið og draga úr því reglugerðafargani sem fylgir bandaríska tekjuskattskerfinu.“

Davíð bendir á að áætlað sé að bandarísk fyrirtæki geymi gríðarlegar fjárhæðir erlendis til að skattheimtuyfirvöld í Bandaríkjunum komist ekki í tæri við þær.

Davíð segir að til að mynda vilji Trump fækka tekjuskattsþrepunum úr sjö niður í þrjú, en á móti verði frádráttarliðum fækkað. „Þá er stefnt að því að tvöfalda skattleysismörkin, þannig að ekki þurfi að greiða skatt af tekjum sem eru undir 12.600 dollurum, eða sem nemur um 1,3 milljónum króna, og er það sérstaklega hugsað fyrir þá sem tilheyra „millitekjuhópum“.“

Samanburðurinn við Ísland

Davíð kýs að nota tækifærið til að bera saman gjörðir Donalds Trump við vilja ríkisstjórnar Íslands. „Áhugavert er að bera þetta saman við þróunina og umræðuna hér á landi. Eftir að kjósendur sendu mestu skattpíningarstjórn lýðveldisins í skammarkrókinn hefur lítið gerst til þess að vinda ofan af þeim gríðarlegu og skaðlegu breytingum sem sú stjórn kom á í íslensku skattaumhverfi.“

Þarna á Davíð við ríkisstjórn Jóhönnu Sigurðardóttur. Nú ríkir ríkisstjórn Bjarna Benediktssonar, sem kunnugt er.

„Sú stjórn hækkaði skatta látlaust en stundin virðist aldrei rétt til þess að lækka þá á ný. Og þegar sagt er að stefnan sé að einfalda skattana, þá virðist sem að í slíkum einföldunum felist gjarnan einhvers konar tilraunir til þess að hala inn enn meira frá íslenskum skattgreiðendum.

Þá verður oft vart við þá meinloku í umræðunni, að ef eitthvað er ekki sérstaklega skattlagt, þá sé ríkið beinlínis að gefa mönnum eftir peninga, líkt og sjálfsaflafé fólks og fyrirtækja sé eign ríkisins. Allar „lækkanir“ verða samkvæmt þeim hugsunarhætti að beinu tekjutapi ríkisins. Þetta meinta tap ríkisins er fyrirferðarmikið í umræðum á Alþingi um skatta. Fáir þar tala um ávinning skattgreiðenda af skattalækkunum.“

Þarf að stíga skrefið

Davíð Oddsson hefur aldrei verið talsmaður mikilla skatta, og það hefur ekki breyst.

„Það er ekki alltaf hægt að fá meira út úr skattgreiðendum. Með hóflegri skattlagningu má hins vegar leysa úr læðingi krafta sem geta leitt til þess að ríkið fái „tekjutapið“ bætt upp með því að stækka þá köku sem til skiptanna er. Þetta hefur oft verið gert, en til að njóta ávinningsins af skattalækkununum þarf að þora að stíga skrefið.“

-sme