…eins og hann á rétt á samkvæmt niðurstöðu dómstóla.
„Brottvísun Husseins Husseins hælisleitanda og fjölskyldu hans hefur nú verið dæmd ólögleg. Héraðsdómur Reykjavíkur komst að þeirri niðurstöðu nú á öðrum tímanum í dag að úrskurður kærunefndar útlendingamála um að vísa fjölskyldunni — vísa honum aftur til Grikklands og flytja hann þangað skuli felldur úr gildi. Hussein, sem notast við hjólastól, og fjölskylda hans voru flutt af landi brott til Grikklands í byrjun nóvember. Brottvísunin vakti hörð viðbrögð og þótti mörgum lögregla ganga harkalega fram,“ sagði Arndís Anna Kristínardóttir Gunnarsdóttir á Alþingi í dag.
„Hæstvirtur félags- og vinnumarkaðsráðherra sagðist á sínum tíma hafa gert alvarlegar athugasemdir við brottvísunina og sagði að sér þætti þetta afar leiðinlegt mál og kvaðst ekki sammála þeirri stefnu sem þarna væri að baki. Íslensk stjórnvöld fluttu Hussein nauðugan úr landi. Ég vil því spyrja hæstvirtan félags- og vinnumarkaðsráðherra: Hvernig líður honum með að hafa þurft að verja ákvörðun og framkvæmd sem nú er búið að úrskurða fyrir dómi að sé ólögmæt? Það var flestum ljóst sem urðu vitni að þeim atburði. Treystir hæstvirtur félags- og vinnumarkaðsráðherra hæstvirtum dómsmálaráðherra fyrir þessum málaflokki?“
Guðmundur Ingi Guðbrandsson ráðherra svaraði:
„En það er alla vega ljóst í mínum huga, þótt ég hafi ekki haft tækifæri til að kynna mér dóminn, enda var a.m.k. ekki búið að birta hann klukkan þrjú í dag, að að mínu viti þarf að tryggja að þessi einstaklingur fái efnismeðferð, að sjálfsögðu, eins og hann á rétt á samkvæmt niðurstöðu dómstóla. Ég geri ráð fyrir því að það verði tryggt. En ef þar til gerð stjórnvöld ákveða að áfrýja málinu snýr það auðvitað aðeins öðruvísi við,“ sagði hann.
„Ég ætla að leyfa mér að fagna því að þetta sé niðurstaða héraðsdóms því að mér finnst eðlilegt að tekið sé tillit til fötlunar fólks í málefnum umsækjenda um alþjóðlega vernd. Þegar við höfum öll haft tækifæri til að kynna okkur þennan dóm þá held ég að það verði áhugavert að sjá hvaða málsatvik það er sem héraðsdómur byggir sína niðurstöðu á. En alla vega út frá því sem brjóstvitið segir manni þá gæti þar verið um mikilvægi samnings Sameinuðu þjóðanna um réttindi fatlaðs fólks að ræða en það er erfitt að fullyrða eitt eða neitt um það hér úr ræðustól þegar maður hefur ekki haft tækifæri til að lesa yfir dóminn,“ sagði Guðmundur Ingi.
