Ég held að þið séuð miklu fleiri en þau sem að vilja viðhalda efnahagslegri kúgun á ómissandi fólki.
Sólveig Anna Jónsdóttir.
Sólveig Anna Jónsdóttir skrifar:
Þrátt fyrir ólöglegan áróður, endalausar árásir á lögvarinn rétt til að gera kjarasamninga, þrátt fyrir ofríki á vinnustöðum Eflingar-fólks og kúgunar og þöggunartilraunir hinna ríku (the tyranical managers eins og einn góður félagi í samninganefnd kallar þá), þrátt fyrir svívirðilega aðför ríkissáttasemjara og valdafólks að samninganefnd Eflingar og sjálfstæðum samningsrétti okkar, sýndu Eflingar-félagar enn á ný að hugrekki þeirra er slíkt að þau geta boðið þessu öllu byrginn. Þau tóku ákvörðun sem frjálsar, fullorðnar manneskjur um að standa saman og með samstöðuna að vopni senda þau skilaboð að enginn getur komið í veg fyrir að þau berjist fyrir því að fá mannsæmandi laun fyrir sína ómissandi vinnu. Ekki SA, ekki ríkissáttasemjari, og ekki hinir háu herrar stjórnarráðsins. Enginn.
Ég sendi kæra baráttukveðju til Eflingar-fólks á Íslandshótelum. Þið eruð hetjur. Og ég sendi heitar þakklætiskveðjur til meðlima samninganefndar Eflingar. Hollusta ykkar við félagsfólk Eflingar, dugnaður og eldmóður eru svo mögnuð að þið getið tekist á við bókstaflega allar áskoranir sem upp koma og unnið sigur.
Stuðningsfólki samninganefndar Eflingar sendi ég líka kærar kveðjur. Ykkar vinátta og velvilji kom okkur yfir ýmsa erfiða hjalla. Það er gott að vita að það er til fullt af fólki sem trúir því að Eflingar-fólk eigi skilið að lifa góðu lífi, frjálst við endalausar fjárhagsáhyggjur. Ég held að þið séuð miklu fleiri en þau sem að vilja viðhalda efnahagslegri kúgun á ómissandi fólki. Það er sannarlega hughreystandi.
Sjáumst í baráttunni.
Áfram Efling, alla leið!
