Því er Framsókn í nöp við neytendur?

„Hvers vegna er Framsóknarmönnum svona í nöp við neytendur? Hvers vegna stillir flokkurinn sér ítrekað upp gegn neytendum, með sérhagsmunum?“

Þannig spurði Þorsteinn Víglundsson Sigurð Inga formann Framsóknar.

„Á að fórna almannahagsmunum neytandans á Íslandi varðandi lýðheilsu, varðandi möguleika þess að geta áfram farið út í búð með öruggum hætti og verið viss um að maður geti keypt vöru sem ekki inniheldur sýklalyfjaónæmar framleiðsluvörur sérhagsmunafyrirtækjanna, sem háttvirtur þingmaður og flokkur hans berst fyrir? Að þau fyrirtæki ráði för? Á þetta að snúast um stóru matvælafyrirtækin í heiminum sem eiga að stjórna öllu því sem borið er á borð fyrir neytendur í nafni þess að hugsanlega sé varan aðeins ódýrari og hugsanlega geti maður valið úr þremur eða fjórum öðrum vöruflokkum? En í staðinn skal neytandinn éta það sem framleitt er við aðstæður sem eru ekki þær sömu og á Íslandi. Það er nákvæmlega það sem áhugaverðu ályktanirnar frá Framsóknarflokknum fjölluðu um.“

Þannig hófst svar Sigurðar Inga. Og síðan sagði hann:

„Við sögðum: Við erum í einstakri stöðu á Íslandi, einstakri. Það er ekkert annað land í heiminum þar sem til að mynda E. coli-bakterían finnst án sýklalyfjaónæmis. Þetta er eina landið í Evrópu, og því sunnar sem við komum í álfunni og því austar sem við förum því meira hækkar magn sýklalyfja sem notuð eru við framleiðsluna og áhættan á sýklalyfjaónæmum bakteríum sem koma þarna inn eykst, því miður.

Staðan er sú að sérfræðingar sem gerst þekkja segja að ef fram heldur sem horfir muni 10 milljónir manns deyja af völdum þessa fyrir árið 2050, eða jafnmargir og deyja af völdum krabbameins. Þetta eru raunverulegir hagsmunir neytenda í landinu.“