„…við erum búin að vera hér í sjö ár með ríkisstjórn sem hefur algjörlega verið með ómarkvissa stefnu í þessum málum.“
Þorgerður Katrín Gunnarsdóttir.
Alþingi „Ferðaþjónustan er vissulega orðin ein stærsta atvinnugreinin okkar og hefur vaxið gríðarlega síðastliðin ár en það hefur vantað langtímasýn fyrir greinina. Viðreisn hefur í langan tíma lagt áherslu á það að hér verði mótað langtímaplan um það hvernig við ætlum að sjá heildstæða ferðaþjónustu þróast til næstu ára og áratuga,“ sagði Þorgerður Katrín Gunnarsdóttir á Alþingi, þegar rætt var um gjaldtöku á friðlýstum svæðum.
„Það eru auðvitað margar áskoranir í þeim efnum. Við í Viðreisn höfum lagt áherslu á að móta heildstæða ferðaþjónustustefnu. Við leggjum áherslu á að nýta náttúruauðlindir okkar á sjálfbæran hátt og að nýtingin eigi að byggjast á heildstæðu mati og þjóðhagslegum ávinningi og afleiðingum. Ég vona það auðvitað, virðulegur forseti, að það sé þverpólitískur skilningur fyrir nauðsyn þess að fjárfesta í innviðum á ferðamannastöðum um allt land til verndar umhverfi og náttúru og tryggja um leið jafnari dreifingu ferðamanna um landið allt yfir árið. Við eigum ekki að vera feimin að ræða gjaldtöku og aðgangsstýringar í þessum efnum. Það er eðlilegt að það sé tekið þjónustugjald fyrir veitta þjónustu enda kostar sitt að halda uppi aðgengi og öryggi þegar kemur að náttúruperlum þjóðarinnar,“ sagði Þorgerður Katrín.
Og svo þetta:
Þannig týnist tíminn.
„Það verður hins vegar að segjast eins og er að þegar ég las spurningarnar frá háttvirtum þingmanni til ráðherra — þetta eru stjórnarþingmenn að tala — þá allt að því hló ég upphátt, ekki út af innihaldslausum spurningum heldur fannst mér þetta draga fram að við erum búin að vera hér í sjö ár með ríkisstjórn sem hefur algjörlega verið með ómarkvissa stefnu í þessum málum. Það er ekkert búið að gerast. Það er ekki búið að taka neina ákvörðun, m.a. um heildstæða stefnu í ferðaþjónustu sem markerar og setur niður sporin í því hvernig við ætlum að taka þjónustugjöld. Sjö ár, þannig týnist tíminn, eins og segir í laginu. Það er kominn tími til þess að við fáum einfaldlega ríkisstjórn sem tekur ákvarðanir í málum en hummar ekki málin endalaust fram af sér.“
