Landbúnaður „Í mínum huga eru verkfallsaðgerðir dýralækna að bitna þyngst á matvælaframleiðendum sem eru þriðji aðili og hafa í raun ekkert með deiluna að gera og enga aðkomu að samningunum. Undanþágan til að slátra er skilyrt því að afurðirnar fari í frost og satt best að segja hefðum við skrifað undir hvað sem er og jafnvel farið berrassaðir niður Laugaveginn til að geta haldið framleiðslunni áfram,“ sagði Jón Magnús Jónsson, bústjóri hjá Ísfugli, í samtali á bondi.is.
Í fréttinni segir að miklar birgðir af kjúklinga- og svínakjöti hafi safnast upp vegna verkfalla BHM. Gera megi ráð fyrir að milli 1.200 og 1.400 tonnaf kjöti í lok þessrar viku. Verkfall dýralækna hófst 20. apríl og stendur enn.
„Svínabændur fengu undanþágu til að slátra í frost í síðustu viku og sú undanþága hefur náð fram í þessa viku. Eftir undanþáguna sem nú er í gildi á ég ekki von á að það verði slátrað meira í frost. Vandi svínabænda er orðinn það mikill að áframhaldandi undanþága til að slátra og frysta kjötið hefur orðið lítið að segja. Framleiðendur eru ekki að fá neinar tekjur og velferð dýranna er í húfi,“ sagpi Hörður Harðarson hjá Félagi svínabænda.
Frystigeta framleiðenda svínakjöts er á þrotum og svo ber að hafa í huga að eignarhald á afurðunum er með mismunandi hætti eftir að dýrið fer í sláturhús. Sumir framleiðendur eiga kjötið alveg þangað til það fer á markað en í öðrum tilfellum verða eigendaskipti um leið og slátrun hefur farið fram.
Efast um lögmæti
Hörður dregur í efa lögmæti þess að leyfa undanþágur til slátrunar með því skilyrði að kjötið fari í frost og segir það mál í skoðun.
„Samkvæmt samantekt hafa safnast upp rúm 630 tonn af svínakjöti í landinu hvort sem við erum að tala um dýr á fæti eða kjöt í frystigeymslum,“ segir Hörður.
Tekjulaus með öllu
Jón Magnús Jónsson, bústjóri hjá Ísfugli, segir að kjúklingaframleiðendur hafi fengið undanþágu til að slátra viku eftir að verkfall dýralækna hófst.
„Slátrunin er í takti og kjötið fer allt í frost og framleiðendur farnir að leigja frystipláss til að koma kjötinu fyrir,“ sagði hann á bondi.is.
Árleg framleiðsla á kjúklingakjöti er um 7.000 tonn, eða 135 tonn á viku. Verkfall dýralækna hefur staðið í á fjórðu viku en undanþága til slátrunar í frost fengist í um þrjár vikur. Því má gera ráð fyrir að 300 tonn af kjúklingakjöti hafi safnast í frystigeymslur vegna verkfallsins.
„Magnið sem fer í frost eykst með hverjum deginum sem líður og á meðan höfum við engar tekjur og erum eins og steinar í vatni og getum ekkert gert. Ef verkfallið leysist ekki fljótlega liggur ekkert annað fyrir en að framleiðendur fari á hliðina með allar geymslur fullar af afurðum sem hægt væri að selja.“
