Þorsteinn ósáttur við Lilju

„Lilja Rafney Magnúsdóttir vék heldur óvirðulega að mér, að mér fannst, lét að því liggja að ég væri hér í nafni einhverra annarra en sjálfs mín og minnar samvisku. Það þykir mér afskaplega leiðinlegt að hlýða á. Mér þætti reyndar afskaplega vænt um að við temdum okkur hér að fara í málefnið en ekki manninn,“ sagði Þorsteinn Víglundsson félagsmálaráðherra.

Lilja Rafney hafði spurt hvort Þorsteinn sé enn tengdur sínum fyrri vinnuveitendum í Samtökum atvinnulífsins. Sjá hér.

Ákaflega stoltur

„Málefnið er nefnilega gott, um keðjuábyrgð fyrirtækja, um baráttuna gegn félagslegum undirboðum á vinnumarkaði og að tryggja að öll fyrirtæki starfi hér við jöfn samkeppnisskilyrði og að allir launþegar, sama hvar þeir starfa, búi við sambærilegan rétt. Þar er ég ákaflega stoltur af því að flytja þetta mál um útlenda starfsmenn, sem snýr sérstaklega að keðjuábyrgð,“ sagði ráðherrann.

Eiga við sig

„Mér þykja það mikil tímamót að hér séu verkalýðshreyfing og atvinnurekendur að ná saman um það hvernig að þessu skuli staðið,“ sagði Þorsteinn.

„Málið er vissulega ekki einfalt, það er að mörgu að hyggja þarna, en þarna held ég að náðst hafi mjög farsæl lausn sem er þá lagt af stað með í tilraunaskyni í ákveðnum geirum og verður vonandi hægt að útfæra á fleiri atvinnugreinar eftir því sem fram líður og við fáum reynslu á þetta mál. Ég fagna því vissulega að málið komi fram. Háttvirtum þingmanni þykir málið kannski bera þess vott að það komi úr þessari átt og finnst það súrt, en það verða aðrir að eiga við sig. Mér þótti leitt að ýjað væri að því að ég væri að þessu á einhverjum annarlegum forsendum. Það þykir mér ekki fallegur málflutningur á þingi.“