Þorsteinn Víglundsson, fyrrverandi ráðherra og núverandi forstjóri, er í löngu viðtali í viðskiptakálfi Moggans.
„Mér líkar illa sú orðræða sem felur í sér að þjófkenna atvinnurekendur og tel það til skammar fyrir verkalýðsforystuna sem á að vita betur. Umræðan ætti að einkennast meira af gagnkvæmri virðingu og skilningi,“ segir Þorsteinn.
Hann er ekki spurður hvað hann eigi við. Fyrst koma í hugann ábendingar um launaþjófnað.
„Nú erum við í þeim veruleika að hagkerfið hefur tekið á sig mikið högg og við verðum að setjast niður og spyrja hvernig fyrirtækin eigi að takast á við það. Og ekki aðeins fyrirtækin, heldur eru ríki og sveitarfélög komin í mikinn hallarekstur og þurfa að taka á sig verulegar launahækkanir á næsta ári. Við þekkjum það frá árunum fyrir þjóðarsátt að víxlhækkanir launa og verðlags skila að lokum engum kaupmætti. Það er mikilvægur lærdómur sem ekki má gleyma.“