„Við höfum sannarlega rætt við fyrirtæki um þessi tækifæri, sum rótgróin en önnur í stofnun,“ sagði Elliði Vignisson, bæjarstjóri Ölfuss, í samtali við Miðjuna.
„Þannig hafa til að mynda Fóðurblandan, Síld og fiskur og fl. sagt frá áformum um að koma hér upp umfangsmiklum rekstri. Það er hins vegar ekki okkar að segja frá áformum einstakra fyrirtækja að er hins vegar ekki okkar að segja frá áformum einstakra fyrirtækja svaraði hann aðspurður um hvaða fyrirtæki hugi að flutningi til Þorlákshafnar.
En hvers vegna huga fyrirtæki að flutningi til Þorlákshafnar?
„Á seinustu tveimur árum hafa umsvif Þorlákshafnar vaxið gríðarlega. Svo er nú komið að höfnin er orðin ein af lykil vöruhöfnum landsins með reglulegar siglingar bæði á meginland Evrópu og á Skandinavíu. Því til viðbótar eru umtalsverðir flutningar með skipum í óreglulegum siglingum með margskonar vörur og afurðir. Á næstu árum munum við sjá enn meiri vöxt -svo sem með tilkomu farþegaferja, enda siglingar hingað langtum hagkvæmari og umhverfisvænni en siglingar inn á Faxaflóa. Samhliða þessum breytingum hafa fyrirtæki verið að leita til okkar eftir lóðum í námunda við hafnarsvæðið undir margskonar framleiðslu enda hægt að koma hér upp húsnæði til framleiðslu við inn- og útflutningshöfnina á margfalt ódýrari máta en á höfuðborgarsvæðinu. Flutningur inn á markaðssvæðið tekur svo ekki nema um 25 mínútur um greiðfæra leið og fjarlægðin því ekki nokkur fyrirstaða.“
