„Við fjölskyldan ætluðum að verja jólunum með ömmum og öfum hér heima en þegar fjölskyldumeðlimir fóru að greinast með Covid-19 fórum við saman fjögur í einangrun enda jólin á næsta leiti, börnin ung og við erum nú rúmlega hálfnuð með þann tíma. Við erum öll einkennalaus og fullfrísk og öll með Covid. Skjátími hefur verið langt umfram almennar reglur á heimilinu. Vinnufundir vegna Covid eru fjarfundir og sem betur fer fengu allir nýjar bækur í jólagjöf og möndlugjöfin var Partý Skellur svo það er hlegið yfir því – og kettinum Ronju sem flækir sig í kastölunum sem við byggjum,“ skrifar Þórdís Kolbrún R. Gylfadóttir á Facebook. Hún notar tækifærið til að hnýta í Tómas Guðbjartsson vegna þessarar greinar hans.
„Í umræðunni í dag sé ég að hjartalæknirinn frægi, Tómas Guðbjartsson, snýr út úr orðum mínum í pistli sem ég skrifaði í Kjarnann um jólin. Í pistlinum sagði ég að mannréttindi mætti ekki skerða til langframa vegna álags á heilbrigðiskerfið. Ég stend innilega og algjörlega við þá afstöðu mína. Þarna er lykilorðið „til langframa“ – og ég trúi að það geti verið ágæt samstaða um það markmið. Vonandi komumst við fljótt á þann stað að geta átt yfirvegað og innihaldsríkt samtal um þessi mikilvægu og flóknu viðfangsefni. Þau eru því miður ekki líkleg til þess að leysast af sjálfum sér á næstunni.“
Fyrir eru með Covid í þingliði Sjálfstæðisflokks: Bjarni Benediktsson formaður, Birgir Ármannsson, forseti þingsins, Óli Björn Kárason, formaður þingflokksins, og Áslaug Arna ráðherra. Guðlaugur Þór er á Tenerife og Jón Gunnarsson því eini ráðherra flokksins sem er við störf.
