Lilja Rafney Magnúsdóttir, þingmaður Vinstri grænna, sagði á Alþingi í dag að þrír þingmenn úr velferðarnefnd hafi óskað eftir að fá Ragnar Árnason, prófessor við Háskóla Íslands, til að koma fyrir nefndina og gera grein fyrir fullyrðingum hans og hugmyndum í grein sem hann skrifaði nýlega í Tímarit hagfræðinema, Hjálmar.
Lilja Rafney sagði að í greininni rökstyðji Ragnar að opinberar heilbrigðistryggingar séu samfélaginu skaðlegar. „Mér finnst full ástæða til þess að við ræðum þessi mál í velferðarnefnd. Þó að öllum sé að sjálfsögðu frjálst að setja fram skoðanir sínar í blaðagreinum vekur þetta vissulega ótta þar sem viðkomandi aðili er formaður ráðgjafarhóps í ríkisfjármálum hjá hæstvirtum fjármálaráðherra,“ sagði Lilja Rafney.
Hún sagði fullt tilefni til að fara yfir málið „..og skoða hve langt þessi hægri sinnaða ríkisstjórn, sem talað hefur fyrir miklum einkarekstri, ætlar hugsanlega að ganga í þessum efnum varðandi heilbrigðiskerfið okkar, hvort þetta endurspegli hug ráðherra og þeirra þingmanna sem hér eru í stjórnarmeirihluta.“
