„Forsætisráðherra hefur nú tvívegis á þessu kjörtímabili skyldað stjórnarþingmenn til að fella tillögur um að tímabinda veiðiréttinn í fiskveiðistjórnarlögum. Og nú hótar hún að ljúka kjörtímabilinu með því að afgreiða í ágreiningi þjóðareignarákvæði í stjórnarskrá án skilyrða um tímabindingu.“
Það er Þorsteinn Pálsson fyrrverandi formaður Sjálfstæðisflokksins og fyrrum forsætisráðherra og sjávarútvegsráðherra, sem skrifar þetta í grein í Fréttablaðinu í dag.
„Engu er líkara en hjartað slái ekki með fólkinu í landinu,“ bætir hann við.
Þorsteinn segir í greininni: „Tuttugu ár eru frá því að allir flokkar samþykktu tillögu auðlindanefndar, undir forystu Jóhannesar Nordal, fyrrverandi seðlabankastjóra, um að skrifa í stjórnarskrá þjóðareignarákvæði um að endurgjald skyldi koma fyrir tímabundinn veiðirétt.
Svipuð tillaga kom síðar frá stjórnlagaráði.
Fyrir þremur árum hafði Sjálfstæðisflokkurinn einn horfið frá sáttinni í auðlindanefnd. Nú hafa allir þrír stjórnarflokkarnir gert það. Enginn þeirra hefur þó reynt að hrekja röksemdir Jóhannesar Nordal og meðnefndarmanna hans.“
