„Smálán geta farið með líf fólks. Ég þekki dæmi þess að á nokkrum vikum, mesta lagi mánuðum fer fjárhagur fólks úr því að vera þungur í það að verða óviðráðanlegur. Baggi sem fer með og tekur líf fólks.“
Þetta skrifar Ásmundur Friðriksson, þingmaður Sjálfstæðisflokksins. Hann segir einnig og kallar eftir viðbrögðum:
„Ég er að skoða mál einstaklings sem tók rúmar 200.000 kr. í 11 lánum, eða 20.000 í hvert sinn. Í dag, 6 mánuðum síðar stendur skuldin í 615.000 krónum. Þessu til viðbótar er viðkomandi með um 200.000 kr. hjá öðru smálánafyrirtæki. Núna 6 mánuðum síðar skuldar viðkomandi 803.000 krónur. Skuld sem er útilokað að hann geti greitt.
Mig langar að vita hvað margir þarna úti eru að glíma við ókleif skuldafjöll vegna margföldunar smáskulda sem bjóðast á Íslandi og ekki virðist möguleiki að stoppa.
Einstaklingum sem enga möguleika á að greiða aftur þessi lán vegna lágra tekna er samt lánað og lánað þangað til allt er komið í skrúfuna og rúmlega það. Lánafyrirtækin hafa beinan aðgang að launareikningum viðkomandi í bönkum og í hvert sinn sem eihver peningur kemur inn standa smálánafyrirtækin vaktina og taka út allt sem inni er fyrir skuldum viðkomandi.
Langar að fá skilaboð á messenger um þá sem vilja deila með mér stöðunni en ég hyggst skoða þessi mál gagnvart lánafyrirtækjunum. Látum reyna á hvort þetta fólk eigi virkilega engan rétt.“
