„Þið verðið að éta það sem úti frýs“

Alþingi „Úlfur í sauðargæru birtist hjá þessari ríkisstjórn gagnvart því fólki sem er að reyna eftir bestu getu að tóra á lífeyrislaunum frá almannatryggingunum. Þar koma eldri borgarar verst út. Eldri borgarar hafa ekki fengið krónu aukalega, ekki 1 kr., hvað þá aur aukalega öll þau ár sem þessi ríkisstjórn hefur verið við völd, síðustu sjö árin, heldur hafa þeir fengið auknar skerðingar og ríkisstjórnin heldur áfram að skerða orlofsuppbætur og desemberuppbætur þessa fólks,“ sagði Guðmundur Ingi Kristinsson á Alþingi fyrr í dag.

„Ákveðinn hópur eldri borgara á engan rétt á að eiga fyrir jólunum eða fara í orlof, það er algjörlega fáránlegt fyrir þessari ríkisstjórn. En hver er stærsti hópurinn sem verður fyrir verstu skerðingunum í þessu kerfi og kemur verst út?“

Síðan sagði Guðmundur Ingi:

„Á kvenréttindadaginn í dag fer ekki á milli mála að það eru konur. Það sýnir hug þessarar ríkisstjórnar til kvenna. En tökum annað dæmi: Hverjar eru skerðingar í þessu ótrúlega kerfi? Ríkisstjórnin hefur sparað sér nærri 100 milljarða á að breyta ekki krónu á móti krónu eða framfærsluuppbótinni, sem er komin í 65 aura á móti krónu, og meira að segja í viðbót eru þeir að spara sér 11 milljarða aukalega í ár með því að endurskoða ekki frumvarpið um öryrkja. 100 milljarðar eru komnir í sparnað á hverju ári, það sem ríkið sparar sér í þessu ómannúðlega kerfi sem þeir hafa byggt upp undanfarna áratugi, ríkisstjórn eftir ríkisstjórn. Skilaboðin eru skýr til almennings þarna úti, til þeirra sem eru á lífeyrislaunum: Þið verðið að éta það sem úti frýs. Úlfurinn talar og hann segir: Þið fáið ekki neitt.“