Sýning á myndskreytingum úr íslenskum barnabókum opnar í Gerðubergi sunnudaginn 25. janúar kl. 14. Þetta er í fjórtánda skiptið sem sýningin fer fram en hún er opin myndskreytum íslenskra barnabóka sem komu út á fyrra ári. Hátt í 30 myndskreytar hafa skráð sig til þátttöku og sýna myndirnar vel þann fjölbreytileika sem er að finna í íslenskri barnabókaútgáfu. Sýningin Þetta vilja börnin sjá! stendur til 15. mars en fer þá á flakk í sýningarferð þar sem skólabörn vítt og breitt um landið fá að njóta hennar.
Venju samkvæmt verður átta ára reykvískum skólabörnum boðið að taka þátt í fjölbreyttri dagskrá í Gerðubergi. Þau fá fræðslu um myndskreytingarnar og skoða einnig sýninguna Stund milli stríða þar sem sjá má verk systranna Söru og Svanhildar Vilbergsdætra. Bókasafnið er einnig heimsótt, þar spreyta börnin sig í spurningakeppni um þekktar sögurpersónur og fleira skemmtilegt.
