Ef þeir geta ekki fengið það með lögum þá ræna þeir því.
Katrín Baldursdóttir skrifar:
Tvö þúsund milljarðar Bandaríkjadollara. Ég veit ekki einu sinni hvað það þýðir, hvað það er í íslenskum krónum. Ég veit bara að þeir milljarðamæringar sem stýra heiminum í dag stunda stórfellt peningaþvætti með aðstoð banka sem gefa sig út fyrir að vera virtustu bankar í heimi. Milljarðamæringarnir sjá til þess að lama eftirlit með peningaþvætti með því að múta toppunum í bönkunum. Og Ísland er enn á gráa listanum yfir peningaþvætti og fjármögnun hryðjuverka. Íslenskir auðmenn eru ekki á þeim listum sem hér eru til umfjöllunar. Ekki ennþá að minnsta kosti.
Ég sé ekki ástæðu til að rekja málið í smáatriðum. Það gert í fréttinni. Það sem hins vegar blasir við er hve sorglegt það er að stjórnmálamenn samtímans, líka þeir sem segjast vera frjálslyndir vinstrimenn, taka þátt í þessu öllu saman. Með því að samþykkja og styðja fyrirkomulagið sem skapar þennan hrylling. Kerfið sem arðrænir venjulegt vinnandi fólk, láglaunafólk, fátækt fólk, atvinnulaust fólk, fatlað fólk og veikt. Hvern einasta dag og hverju einustu mínútu. Þessum milljarðamæringum er gert kleift að brjóta niður heimili, kúga fólk á vinnumarkaði, lama launþegahreyfingar, mölva niður heilbrigðiskerfi og menntakerfi sem ætlað er almenningi. Þetta er kerfi nýfrjálshyggju hefur þróast sífellt meir að glæpahyggju. Haldi þið að þeir ríku verði sífellt ríkari vegna þess að þeir eru svo snjallir í viðskiptum? Nei þeir ríku verða ríkari með glæpum, peningaþvætti, mútum, stríðsrekstri, mansali, arðráni og kaupum á stjórnmálamönnum, dómurum, bankastarfsmönnum og öðrum opinberum starfsmönnum. Ef þeir geta ekki fengið það með lögum þá ræna þeir því.
Ísland er orðið svona í boði Sjálfstæðisflokksins.
Ísland er orðið svona í boði Sjálfstæðisflokksins fyrst og fremst. En líka í boði Framsóknar og Vinstri grænna. Viðreisn styður núverandi þjóðskipulag líka og mun engu breyta. Sama gildir um Samfylkinguna sem vill fara bónleiðina að ríku kapítalistunum sem mun auðvitað engu skila. Þeir hlæja bara af því. Píratar vilja vissulega draga úr spillingu, en það er eins og að pissa upp í vindinn meðan áfram ríkir núverandi kerfi auðhyggju. Flokkur fólksins talar máli öryrkja og eftirlaunafólks, en í þeim flokki örlar á fáfræði og fordómum gagnvart útlendingum og sá flokkur telst hægri flokkur á hinum pólitíska ás og mun engu breyta því kerfi sem nú er.
Sem betur er Sósíalistaflokkurinn stofnaður til höfuðs þessari auðhyggju og þessu hræðilega kerfi sem nú er við lýði. Flokkurinn sér engan annan möguleika til bjarga fólki og jörðinni undan hamfarahlýnun en að stokka spilin upp á nýtt og skapa manneskjulegt kerfi þar sem allir fá að njóta sín og náttúran líka.