„Fyrrverandi fjármálastjóri Eflingar var ávallt mjög andsnúin því að liðsinna mér þegar ég tók við sem formaður. Að fá skýr svör, útskýringar, aðstoð var aldrei sjálfsagt mál og eiginlega alltaf frekar erfitt, þrátt fyrir að það hlyti að vera augljóst að ég vildi vanda mig eins mikið og hægt var og forðast það að gera mistök,“ skrifaði Sólveig Anna Jónsdóttir, formaður Eflingar.
„Og þegar viðbjóðsleg lygasagan fór af stað um að fyrrum fjármálastjóri hefði verið „send í veikindaleyfi“ af því að ég hefði reynt að fá einhverja glæpsamlega reikninga samþykkta var ég mjög sjokkeruð og eiginlega alveg miður mín. Vegna þess að í raun gerðist nákvæmlega hið þveröfuga: Ég fór til fjármálastjóra og spurði um allt, öll smáatriði, vegna þess að ég var einstaklega upptekin af því að gera allt 100% rétt. Það vissu hún og fyrrum skrifstofustjóri Eflingar sem þó fóru um með ógeðslegan rógburð um mig og starfshætti mína aftur og aftur,“ skrifaði hún.
„En hér er kannski komin ein skýring á því hversu stórkostlega undarleg stemningin og samskiptin voru, hversu erfiðlega það gekk að fá útskýringar og hjálp hjá einum af mikilvægustu starfsmönnum félagsins.“
„Grunurinn snýr að því að forsvarsmenn félagsins hafi ekki staðið skil á opinberum gjöldum um árabil, alls vel á þriðja tug milljóna króna, og þá var ekkert bókhald haldið hjá félaginu. Enn fremur gaf forsvarsmaður félagsins, Mark Kristján Brink, sem er sambýlismaður Kristjönu, út reikninga á Eflingu í nafni M.B. veitinga en tók við greiðslunum persónulega. Þær greiðslur sá Kristjana sjálf um að greiða hjá Eflingu.“