Engum togum skipti, kortaúttektir hrukku upp um 12% milli mánaða!
Ragnar Önundarson skrifar:
Ég ber óbeint ábyrgð á að Sigmund teiknaði DO með sólgleraugu. Samdráttartímabil hófst 1989 og stóð í fjögur ár. Íslandsbanki varð til með sameiningu 4rra banka. Yfirstjórn lánamála kom m.a, í minn hlut, en hún fólst ekki síst í að reyna að lágmarka útlánatöp. Í ársbyrjun 1994 varð ljóst að við vorum komin i gegnum brimskaflinn, en lítið líf var í hagkerfinu.
Einkaneysla og fjárfestingar létu bíða eftir sér. Þá hafði ég samband við aðstoðarmann forsætisráðherra og útskýrði vandann. Bað hann að kanna hvort ráðherrann væri ekki til í að „aflýsa“ kreppunni? Það gerði DO svo í kvöldfréttum Rúv á Pálmasunnudag 1994.
Engum togum skipti, kortaúttektir hrukku upp um 12% milli mánaða! Einkaneyslan hélt áfram að draga atvinnulífið upp úr lægðinni og 1996 tóku fjárfestingar í atvinnulífinu að glæðast. Það var yfirlýsing DO á Pálmasunnudag 1994 sem Sigmund veitti athygli og fannst svo bjartsýnisleg að við hæfi væri að teikna Davíð síðan árum saman með sólgleraugu.
