…nú segja fasteignasalar fórnarlömbum sínum að auðvitað verði um að ræða fjórbreiða bílabrú…
Ólafur Haukur Símonarson skrifaði:
Það er hrein steypa að ætla að fara með brú af Kársnesi yfir í Nauthólsvík. Á voginum gerir oft arfavitlaust veður með talsverðri ölduhæð og suð-vestan bylmingsskotum sem henda öllu lauslegu á loft. Skipulagsyfirvöld í Kópavogi hafa á sína uppdráttum teiknað einhverja brúarómynd sem fasteignasalar, þeir sem eru að tæla fólk til að kaupa íbúðir á Kársnesinu, segja að verði greið leið fyrir alla inn í Reykjavík. Upphaflega átti brú þessi að vera fyrir gangandi og hjólandi mannskap (al-vitlaust), en síðar hugkvæmdist mönnum að bæta við strætórein, en nú segja fasteignasalar fórnarlömbum sínum að auðvitað verði um að ræða fjórbreiða bílabrú svo blessuð afkvæmin þurfi ekki að vakna fyrr en þrjár mínútur í níu til þess að vera komin í háskólana í Reykjavík klukkan níu.
Nú er allt vitlaust út af einhverju skálahrúgaldi sem skyndilega er orðinn kjarninn í flugsögu Íslands. Það eru margar braggaraunirnir hjá blessaðri borgarstjórninni. Áhyggjur Harðar Guðmundssonar flughetju sem um áratugabil hefur rekið flugfélagið Ernir af óskiljanlegri elju og þrjósku skil ég mæta vel; hann á skilið aðstöðu í nútímalegt flugskýli þar sem hann er óhultur með sínar góður flugvélar. Ef einhver ástæða finnst til þess að gera safngrip úr hinum „sögulega mikilvæga flugbragga“, eða vegna þess að íbúar á Kársnesi þurfa að komst í bæinn, þá vil ég benda á þann augljósa kost að gera jarðgöng undir voginn og „braggann“; göng sem yrðu miklu skilvirkari, öruggari og ódýrari lausn en brú sem aldrei yrði annað en góður staður til fremja sjálfsvíg.
Greinin birtist á Facebooksíðu höfundar.