Málin standa ekki vel þegar íslenskt samfélag leyfir sér að rýra til muna greiðslur úr lífeyrissjóðum til eldri borgara og leggja 70% skatt á vinnutekjur.
Jón Örn Marinósson skrifar á Facebook:
Það er ekki nóg, Katrín Jakobsdóttir, að fólk, sem hefur lagt sitt af mörkum til þessa samfélags með vinnu og skattgreiðslum í hálfa öld, það er ekki nóg að þetta fólk, Katrín, geti náð endum saman þegar það lætur af störfum fyrir aldurs sakir. Þetta fólk á bæði rétt og kröfu til þess að íslenskt nútímasamfélag geri því kleift að lifa mannsæmandi lífi allt til æviloka og veita sér fleira en að fullnægja brýnustu nauðþurftum.
Þú segir, Katrín Jakobsdóttir, að málin standi vel, þegar litið sé til ráðstöfunartekna eldri borgara. Ég leyfi mér hins vegar að segja þér, Katrín Jakobsdóttir, þó að þú segir annað, að málin standa ekki vel þegar íslenskt samfélag leyfir sér að rýra til muna greiðslur úr lífeyrissjóðum til eldri borgara og leggja 70% skatt á vinnutekjur þessa eftirlaunafólks sem hefur heilsu til að leggja áfram sitt af mörkum til samfélagsins með starfsorku sinni. Málin standa ekki vel á meðan eldri borgarar eru látnir sæta slíkum afarkostum, Katrín Jakobsdóttir, og gagnast ekki til úrbóta að skipa enn einn starfshópinn um málefni eldri borgara til þess eins líkt og ævinlega áður að friða samvisku stjórnmálamanna sem hafa ekki staðið við gefin fyrirheit.
