„Hér er verið að leggja til að fjárhæðir fjárhagsaðstoðar hækki um 2,4%. Þá verður grunnfjárhæð fjárhagsaðstoðar 212.694 kr. á mánuði fyrir skatt. Það er skammarlega lág upphæð og gengur engan veginn upp til þess að framfleyta sér og er að mati sósíalista smánarblettur á borginni. Fulltrúi sósíalista hefur lagt til frekari hækkanir á þessari upphæð og mun halda áfram að gera slíkt,“ bókaði Sanna Magdalena Mörtudóttir, borgarfulltrúi Sósíalistaflokksins, á síðasta fundi borgarráðs.
Borgarráðsfulltrúar Samfylkingarinnar, Viðreisnar, Pírata og Vinstri grænna leggja fram svohljóðandi gagnbókun:
„Fjárhagsaðstoð í Reykjavík er töluvert hærri en í öllum öðrum sveitarfélögum á höfuðborgarsvæðinu.“
Sanna svaraði: „Það er ekki merkilegt að stæra sig af því að vera best pússaði skíturinn og breytir því ekki að enginn getur framfleytt sér á þessari upphæð.“