Bjarni Benediktsson segist ætla að hafa samantekt Hannesar Hólmsteins með sér þegar hann fer í utanferðir.
„Þetta er afskaplega mikilvægt að sé aðgengilegt á einum stað í heildaryfirliti. ….þau eru núna til reiðu á ensku til þess að fylla inn í og vera til aðstoðar við að skýra ýmsa áhrifavalda í aðdraganda hrunsins á Íslandi.“
Þetta sagði hann þegar hann svaraði spurningum frá Sigmundi Davíð, sem er ekki síður kátur með verk Hannesar Hólmsteins. Sigmundur Davíð notaði tækifæri til að hnýta í pólitíska andstæðinga sína. Davíð Oddsson tók síðan upp orð Sigmundar Davíðs og gerði að sínum. Sigmundur Davíð sagði á Alþingi, undir síðustu helgi:
Vinstri fræðimenn og hægri
„Hæstvirtur ráðherra hefur nú tekið við skýrslu Félagsvísindastofnunar Háskóla Íslands um erlenda áhrifaþætti bankahrunsins. Þar er fjallað um margt mikilvægt, m.a. hluti sem var löngu tímabært að skoða formlega. Nokkrir af vinstri kanti stjórnmálanna hafa að vísu sett út á að í skýrslu um erlenda áhrifaþætti bankahrunsins sé of mikið fjallað um erlenda áhrifaþætti bankahrunsins, of lítið um skoðanir þeirra sjálfra á innanlandspólitíkinni. Í leiðinni hafa menn hnýtt í aðalhöfund skýrslunnar og persónu hans, jafnan sama fólk og heldur því fram að það sé algjörlega óforsvaranlegt að gagnrýna fræðimenn. Það á þá væntanlega bara við um nógu vinstri sinnaða fræðimenn.“
Bjarni segist hafa átt frumkvæðið
Ekki er hægt að lesa annað úr orðum hans en hann segist hafa átt frumkvæðið að Hannesarsamantektinni.
„Þess vegna taldi ég á sínum tíma mikilvægt að skoða erlendu þættina. Það sem við erum með í höndunum núna er samantekt, yfirlit yfir ýmsa þætti sem miklu skipta, t.d. að Íslendingar voru greinilega einangraðir á sínum tíma. Það gildir bæði hvað varðar samstöðu innan Alþjóðagjaldeyrissjóðsins, en eins og allir muna tók marga mánuði að fá niðurstöðu í stjórn Alþjóðagjaldeyrissjóðsins vegna pólitískra deilna á þeim vettvangi um það hvort ætti að koma Íslandi til aðstoðar, og sömuleiðis voru nágrannaþjóðir okkar mjög tregar nema undir sérstökum stífum skilyrðum að styðja við þá efnahagsáætlun. Þetta er mjög athyglisvert og mikilvægt að halda til haga.“
