Ég skal fyrstur manna gerast fótgönguliði í nýrri hreyfingu
Hrafn Jökulsson segir að í dag muni Elísabet systir hans panta Tjarnarbíó þar sem þau geti muni stofna nýjan stjórnmálaflokk; „….almennilegan Umhverfisflokk — með stóru U — sem tekur að sér varðveislu íslenskrar náttúru, menningar og gætir að þeim, sem helst þurfa. Fylgist með, og verið með — orustan um Ísland er rétt að byrja.“
Á Facebooksíðu Hrafns segir einnig:
„Nýr flokkur óskast — Virkjum Íslendinga, ekki Ísland.
Í ljósi nýjustu frétta um uppkaup erlendra auðkýfinga á íslenskum jörðum, virkjanaáforma og tortímingu íslenskra víðerna í þágu bitcoin og þeirrar staðreyndar að 83 prósent af íslenskri raforku er notað í þágu stóriðju — og þess að mikil vá vofir yfir öllum jarðarinnar innbyggjurum, sýnist mér brýn þörf á því að stofna Umhverfisflokk Íslands.
Náttúra og umhverfi eiga sér enga málsvara í núverandi flokkaflóru, og þar virðast allir í eilífu sumarfríi, og fljóta sofandi að sínum lífeyrisósi. — Ég skal fyrstur manna gerast fótgönguliði í nýrri hreyfingu, sem hefur umhverfið í fyrsta sæti, áherslur jafnaðarmanna í velferðarmálum að leiðarljósi og að öðru leyti heilbrigða skynsemi og frjálslyndi í hávegum.“
