Í Artóteki Borgarbókasafns stendur nú yfir sýning á teikningum Ingu Maríu Brynjarsdóttur og sýnir hún nýlegar dýramyndir. Sýningunni lýkur 26. janúar. Dýrin eru af ýmsum toga, allt frá góðkunningjum úr dýraríkinu yfir í furðuskepnur sem aðeins eru til í teikningunni.
Inga María Brynjarsdóttir (f. 1980) stundar nú meistaranám í myndlist við Listaháskóla Íslands. Hún hefur starfað sem teiknari frá því að hún útskrifaðist úr sama skóla með B.A. gráðu í grafískri hönnun árið 2004. Auk þess að myndskreyta bækur hefur hún um helgað tíma sinn því að teikna sérstæðar dýramyndir sem notið hafa mikilla vinsælda. Teikning Ingu Maríu er raunsæisleg, en þó er stutt í fantasíuna. Hún þykir fanga svipbrigði og hreyfingu með sérlega áhrifaríkum hætti og segir á síðu Borgarbókasafns að dýrin lifni við á síðunni.
Inga María hefur tekið þátt í nokkrum samsýningum og birtir myndir reglulega á fjasbókinni, undir yfirskriftinni: „Inga Maria‘s (almost) daily illustrations“. Mynd eftir hana prýðir vegg á veitingastaðnum Kol við Skólavörðustíg.
Sjá frétt á vef Borgarbókasafns.
