„Sjálfstæðisflokkurinn mun aldrei samþykkja almennilegt auðlindaákvæði sem hald er í fyrir þjóðina og við verðum að berjast fyrir því að ná slíku ákvæði í gegn.“
Þorgerðru Katrín Gunnarsdóttir.
Þorgerður Katrín Gunnarsdóttir gerir ekki mikið með orð Bjarna Benediktsson um að unnið verði áfram að breytingum á stjórnarskránni. Hún segir að þegar rætt er um auðlindirnar hrökkvi Sjálfstæðisflokkurinn í baklás.
„Ég vil hvetja hér allt þingið til að sameinast með okkur í Viðreisn og ég bind vonir við að bæði Vinstri græn og Framsókn og fleiri flokkar geti sameinast um auðlindaákvæði í stjórnarskrá sem tryggir sérstaklega rétt þjóðarinnar yfir auðlindum í hennar eigu. Þannig er það ekki í dag. Hvað gerist núna á síðustu tveimur vikum? Þá erum við að sjá eiginlega svörtustu myndina af sérhagsmunagæslu sem hægt er að sjá,“ sagði Þorgerður Katrín.
„Við munum hvernig farið var í þá vegferð núna um daginn að kippa samkeppnislögum úr sambandi til að valta yfir neytendur en moka frekar undir milliliði: 1–0 fyrir sérhagsmunagæslu í landinu, 2–0 núna þegar við erum að fara að ræða um lagareldið á eftir þar sem á að breyta úr því að veita tímabundið leyfi til fiskeldis yfir í ótímabundið. Það er svakalegt að það skuli vera boðið upp á þetta núna ítrekað, að ganga á almannahagsmuni í þágu sérhagsmuna. Það er þetta sem ríkisstjórnin er að bjóða upp á og það er við þessu sem við í þinginu verðum að segja: Stopp, hingað og ekki lengra.“
Þorgerður Katrín sagði svo:
„Ég vil hvetja þingheim til að sameinast um skynsamlegar breytingar á stjórnarskránni, já, um ýmsa þætti sem er sátt um. En við áttum okkur á því að Sjálfstæðisflokkurinn mun aldrei samþykkja almennilegt auðlindaákvæði sem hald er í fyrir þjóðina og við verðum að berjast fyrir því að ná slíku ákvæði í gegn.“
