Svandís, kominn tími til að tengja

Með hvernig rakettu var Svandísi Svavarsdóttur skotið úr raunheimum og yfir í óraunveruleikann? Á sama tíma og starfsfólk Landspítalans segist komið að fótum fram vegna langvarandi álags og þreytu, meðan boðað er að sjúklingar verði útskrifaðir fyrr en nokkru sinni af Landspítala, meðan dæmi eru um að kannski einungis þriðja hvert rúm er notað á deildum sökum manneklu, meðan ljósmæður eru samningslausar og margar að láta af störfum, meðan nánast daglega er verið að segja okkur, reyndar undir rós, að sjúklingar eru settir í hættu vegna ástandsins sem ríkir í heilbrigðiskerfinu, er ráðherrann á allt öðrum stað. Hvert fór ráðherrann?

Nú byggir hún skýjaborgir, áhyggjulaus að því er virðist. Hér er sýnishorn af boðum hennar til þjóðarinnar í pistli sem hún birtir í dag, til þjóðar sem er tvístígandi af áhyggjum af ástandinu sem nú ríkir:

„Stefnt er að aukinni göngudeildarþjónustu við Landspítala, með því að nýta húsnæði við Eiríksstaði sem nú hýsir skrifstofur yfirstjórnar spítalans. Þar yrði til dæmis aðstaða fyrir brjóstamiðstöð Landspítala, miðstöð um sjaldgæfa sjúkdóma, erfðaráðgjöf og innskriftarmiðstöð, auk annarrar göngudeildarþjónustu. Efling göngudeildarþjónustu er mikilvægur liður í styrkingu hins opinbera heilbrigðiskerfis.“

Kommon Svandís. Opnaðu póstinn þinn, hlustaðu, lestu og horfðu á fréttir. Það er allt að hrynja í kringum þig. Fólk fær ekki nauyðsynlega þjónustu, jafnvel ekki lífsnauðsynlega. Þar er boðað að veikara fólk en áður verður sent heim. Mest vegna þess að vantar starfsfólk til að sinna því. Hvernig á þá að manna allar skýjaborgirnar?

Elín Tryggvadóttir, hjúkrunarfræðingur hefur starfað á bráðamóttöku Landspítalans í nítján ár.

Hún var í viðtali í fréttatíma Rúv í gær. Þar sagði hún til dæmis þetta:

„Mér líður bara ekki vel með þetta. Ég hef rosalegar miklar áhyggjur af þessu.  Ég bara veit ekki hvar maður á að koma þessu fólki fyrir. Það sem ég hef áhyggjur af er að við getum kannski ekki tryggt öryggi sjúklinganna okkar og við erum hérna fyrir sjúklingana okkar.“

Svandís Svavarsdóttir, vakna þú og komdu aftur til raunheima, þar hefur þér verið falið veigamikið hlutverk.

-sme