„Þetta er spurning um það hvort meirihluti þjóðarinnar eigi að ráða, eða stórfyrirtækin í gegnum stærsta stjórnarflokkinn,“ það er fyrrverandi formaður Sjálfstæðisflokksins, Þorsteinn Pálsson sem skrifar þetta í grein sem birt er í Fréttablaðinu í dag. Þorsteinn þekkir vel til innanhúss í Valhöll. Tilefnið eru deilur um kvótakerfið.
„Langstærsta óleysta málið gagnvart hagsmunaöflunum er einkarétturinn á nýtingu fiskimiðanna.
Enginn pólitískur ágreiningur er um þjóðareign auðlinda. Lítill ágreiningur er um að einkaréttur er nauðsynlegur til að tryggja hagkvæma nýtingu. Deilan stendur um það hvort þjóðareignin á að vera virk með tímabundnum einkarétti eða óvirk með ótímabundnum einkarétti. Stærstu sjávarútvegsfyrirtækin vilja ótímabundinn einkarétt,“ skrifar Þorsteinn og er ekki hættur.
„Í stjórnarskrármálinu hefur Sjálfstæðisflokknum tekist að koma í veg fyrir að samstarfsflokkarnir geti staðið við stefnu sína um tímabindingu. Stjórnarandstaðan er einhuga um tímabindingu að Miðflokknum undanskildum, sem hefur enn ekki tekið afstöðu.“
Ekki er vafi á að hér skrifar maður sem veit.
