„Stöðugleika hvers er verið að vernda?“

Drífa Snædal, framkvæmdastjóri Starfsgreinasambands Íslands, sagði sig úr Vinstri grænum, þar sem hún var áður framkvæmdastjóri, þegar Katrín Jakobsdóttir myndaði ríkisstjórn með Sjálfstæðisflokki. Drífa líkti samstarfi VG við Sjálfstæðisflokkinn við að ætla að éta skít í fjögur ár.

Drífa skipar sér í þann hóp fólks sem finnur að fjármálaáætlun ríkisstjórnarinnar. Drífa skrifar um áætlunina og byrjar á að vitna orðrétt í hana:

„Ríkisstjórnin leggur áherslu á að gott samstarf takist milli stjórnvalda og aðila vinnumarkaðarins til að varðveita efnahagslegan stöðugleika og efla velferð. Þannig megi stuðla að farsælli niðurstöðu í kjarasamningum næstu ára sem varðveiti óvenju mikla kaupmáttaraukningu síðustu ára með hóflegum launahækkunum og skili heimilunum áfram auknum kaupmætti.“

„Ha? Hóflegum launahækkunum,“ spyr Drífa og skrifar: „Án þess að nýta skattkerfið til tekjujöfnunar heldur þvert á móti ýkja misskiptinguna? Stöðugleika hvers er verið að vernda? Velferð hvers? Hvaða góða samstarf á að byggja á þessum grunni?“

Sigurður G. Tómasson, landsþekktur útvarpsmaður, skrifar: „Hef verið sósíalisti í neira en fimmtíu ár. Seinustu árin hef ég lítið á VG og Samfylkinguna sem mitt fólk. Það var mér erfitt þegar þessir flokkar þrengdu hag öryrkja, aldraðra og langveikra eftir hrunið en maður lét það yfir sig ganga, því flokkarnir voru að bjarga þjóðinni frá gjaldþroti. Nú er okkur sagt að fjárhagur ríkisins hafi aldrei verið betri. VG í stjórn. Er þá ekki fyrsta verkið að lagfæra kjör okkar og draga úr ójöfnuði sem hefur aldrei verið meiri. Nei ekki aldeilis. Samferð minni og VG er lokið.“