„Þegar þingmálaskrá var gefin út fyrir skömmu tók sá sem hér stendur ákvörðun um að ekki yrði mögulegt að ráðast í þessar stóru kerfisbreytingar núna á kosningavetri, heldur ætlum við að taka einhver minni skref og nýta þá til þess þennan 1,1 milljarð sem er til ráðstöfunar á yfirstandandi ári og á næsta ári, ef Alþingi Íslendinga samþykkir fjárlagafrumvarp eins og það liggur fyrir þinginu,“ sagði Ásmundur Einar Daðason félagsmálaráðherra á Alþingi í dag.
Það var stjórnarþingmaðurinn, Ólafur Þór Gunnarsson, sem saumaði að Ásmundi Einari: „Hæstvirtur ráðherra þekkir eins og ég að af þeim u.þ.b. 4 milljörðum sem voru ætlaðir á fjármálaáætlun 2017–2021, ef ég man rétt, á ári, hefur ekki verið ráðstafað 1,1 milljarði. Því vil ég beina þeirri fyrirspurn til hæstvirts ráðherra: Hvenær munu þessir peningar komast til þeirra sem þarfnast þeirra? Er ekki óboðlegt að þessir fjármunir hafi setið aðgerðalausir allan þennan tíma án þess að gera þeim gagn sem virkilega þurfa á þeim að halda? Er ekki tímabært að ráðuneytið segi þingi og þjóð hvaða áform það hefur um ráðstöfun þessa fjár?“
Ólafur Þór bætti við: „Þetta eru umtalsverðir fjármunir, sérstaklega þegar haft er í huga að þarna erum við að tala um hóp Íslendinga sem hefur upp til hópa úr litlu að spila. Það er full ástæða til að ráðherrann sé skýr í svörum með það hvenær eigi að koma þessum peningum til þeirra sem þurfa og hverjir eigi að fá þessa peninga.“
Við ætluðum…
Þá kom yfirklór ráðherrans: „Það hefur ekki gengið eins og áætlað var og ekki náðist samstaða um það, hvorki á vinnumarkaði né meðal hagsmunasamtaka. Við ætluðum að stíga ákveðin skref og voru 2,9 milljarðar af þessum 4 milljörðum notaðir til þess að ná fram ákveðnum breytingum sem hefðu þau áhrif að þær væru mögulega að tala við nýtt kerfi þegar það tæki við. Þessi 1,1 milljarður sem eftir var var hugsaður með sama hætti, þ.e. að hvetja til þátttöku á vinnumarkaði og draga úr skerðingum o.s.frv.“
