Ein mesta og harðasta stjórnarandstaðan kemur oft úr Hádegismóum, frá ritstjóra annars tveggja dagblaða landsins, Morgunblaðsins.
Davíð Oddsson er ekki og hefur ekki verið hrifinn af Viðreisn, tilurð flokksins eða stofnun hans og þá ekki af formanninum, Benedikt Jóhannessyni. Benedikt er umfjöllunarefni Staksteina dagsins.
„Frá því var greint í gær að í fjármálaráðuneytinu væri unnið að því að lagfæra þau mistök sem vinstri stjórnin gerði í skattlagningu á eldsneyti. Vinstri stjórnin hækkaði skatta á bensín langt umfram skattana á díselolíuna í þeim tilgangi að þvinga fólk til að kaupa díselbíla,“ stendur þar.
Þá er bent á að gjöldum á bíla var breytt díselbílum í vil og afleiðingin varð sú að díselbílum fjölgaði á kostnað bensínbíla.
„Síðan hefur komið í ljós að mengunin frá díselbílunum er síst skaðminni en sú frá bensínbílunum og því vilja núverandi stjórnvöld snúa við blaðinu og vinna að því að draga úr notkun díselolíu. Til þess eru í meginatriðum tvær leiðir. Annars vegar er hægt að lækka gjöld á bensín þannig að það verði aftur hagkvæmur kostur í samanburði við díselolíuna.“
Og þá kemur hin stóra gagnrýni. „Hins vegar er hægt að hækka gjöldin á díselolíuna þannig að hún verði óhagkvæmari kostur í samanburði við bensínið. Og þá er það stóra spurningin: Hvora leiðina ætli Benedikt Jóhannesson fjármálaráðherra hyggist fara, skattalækkun eða skattahækkun? Það þarf svo sem ekki að spyrja að því, að sjálfsögðu velur hann að hækka skatta. Að öðrum kosti væri hætta á að almenningur héldi meiru eftir í buddunni.“
